Ձեր վստահելի աղբյուրը

Հանրակրթական դպրոցների «Հայոց պատմության» 8-րդ դասարանի հաստատված նոր դասագրքում 1828 թվականին Արևելյան Հայաստանի միացումը Ռուսական կայսրությանը  որպես «բռնակցում» ներկայացնելու հատվածը փոփոխվել է։

ԿԳՄՍ նախարարության Հանրակրթության վարչության պետ Թամարա Սարգսյանը լրագրողներին ասաց, որ «Հայոց պատմության» 8-րդ դասարանի նոր ստեղծված դասագրքի հետ կապված եղել են որոշ անհանգստություններ, մտահոգություններ։

«Թեմաների վերնագրերից մեկում «բռնակցում» բառն օգտագործելու վերաբերյալ ստացել ենք տարբեր անհանգստություններ արտահայող ահազանգեր։ Դրանից հետո հեղինակային  խմբին առաջարկվել է վերանայել այդ մոտեցումը։ Հեղինակային խումբը ենթավերագրի վերնագիրը, ձևակերպումը վերանայել է ու համապատասխանեցրել այն ձևակերպումներին հետ, որոնք ունենք «Հայոց պատմություն» առարկայի առարկայական ծրագրում։

Այս պահին դասագրքի խմբագրված տարբերակն ուղարկվել է Դասագրքերի շրջանառու հիմնադրամ, որ փոփոխված տարբերակը կտեղադրի կայքում ու տպագրության կգնա փոփոխված տարբերակով»,- նշեց նա։

Թ.Սարգսյանն ասաց, որ սա ոչ այնքան վրիպում է, որքան «գուցե այդ տեսակյունից հարցը չէին դիտարկել»։

«Մենք շատ կարևոր կարգավորում ունենք. դասագիրքը երաշխավորելուց հետո տեղադրվում է նախարարության պաշարաների շտեմարանում կամ Դասագրքերի շրջանառու հիմնադրամի կայքում և երկու շաբաթ ժամանակ է տրվում, որպեսզի դասագիրքը օգտագործողները՝ ուսուցիչներ, ծնողներ, հասարակություն, ծանոթանան դասագրքի հետ, սա հնարավորություն է  տալիս եթե վրիպումներ կան, մինչև տպագրությունը ուղղել»։

Նա նշեց, որ  խնդիրը վերնագիրի հետ էր կապված, բովանդակությունում արտացոլված են այն իրադարձությունները, որոնք հաջորդաբար տեղի են ունեցել 19-րդ դարում։

Հարցին՝ բողոքները ումի՞ց են ստացել, նա պատասխանեց, որ ստացել են լրատվամիջոցերից, մասնագետներից։

Նշենք, որ ՌԴ ԱԳՆ-ն կոչ է անում ՀՀ իշխանություններին թույլ չտալ 8-րդ դասարանի պատմության դասագրքի օգտագործումը դպրոցներում՝ նշելով. «Մոսկվան ակնկալում է, որ Հայաստանի իշխանությունները թույլ չեն տա դպրոցներին փոխանցվի 8-րդ դասարանի պատմության նոր դասագրքը, որը «խեղաթյուրում է 18-րդ դարի վերջի 19-րդ դարի սկզբի իրադարձությունները Հարավային Կովկասում»։ 

ՌԴ ԱԳՆ-ն պարզաբանել է, որ այս դասագրքի գլուխներից մեկում «Արևելյան Հայաստանի բռնի միացումը Ռուսաստանին» սադրիչ վերնագրի ներքո վերանայվել են 1826-1828 թվականների ռուս-պարսկական պատերազմի արդյունքների գնահատականները, իսկ Թուրքմենչայի պայմանագիրը գնահատվել է, որպես Արևելյան Հայաստանի «անեքսիա»։