Ձեր վստահելի աղբյուրը

Հայաստանը պաշտոնական նամակ, ծանուցում չի ստացել ռուսական կողմի տարածած այն հայտարարության մասին, թե ՌԴ-ում վաճառվող հայկական կոնյակի գրեթե 90 տոկոսը «անվտանգ» չէ, չեն համապատասխանում ԳՕՍՏ-ներին և Ռուսաստանի Դաշնության օրենսդրությանը։ Այս մասին Panorama.am-ը տեղեկացավ  ՀՀ սննդամթերքի անվտանգության տեսչական մարմնի իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանից։

«Երբ որ կլինեն պաշտոնական բացատրություններ,  ըստ այդմ մենք էլ կկողմնորոշվենք, կհասկանանք, թե ինչ է կատարավում»,-  ասաց նա։

Քանի որ պաշտոնական ոչինչ չկա, Ա. Հարությունյանն ասաց, որ տեղյակ չեն, թե որ ապրանքանիշների մասին է խոսքը։

Հիշեցնենք, որ «Հակակեղծարարություն» միջազգային ասոցիացիայի և Կոնյակի, ալկոհոլային խմիչքների և ալկոհոլային արտադրանք արտադրողների միության համատեղ ուսումնասիրության համաձայն, ռուսական խանութներում վաճառվող հայկական կոնյակների գրեթե 90%-ը «անվտանգ» չէ, արտադրանքի գրեթե կեսը պարունակում է ոչ խաղողի սպիրտներ։