Ձեր վստահելի աղբյուրը

«Ինչպես գութանն է հողը հերկում` բարիք ստեղծելու համար, այնպես էլ Փառատոնը` հող  է պարարտեցնում ազգային մշակույթի պահպանման  համար»,- համոզված են «Գութան» Հայաստանի ազգային-ավանդականերգի-պարի փառատոնի կազմակերպիչները։ 

«Գութան» Հայաստանի ազգային-ավանդականերգի-պարի ամենամյա փառատոնը, որն իրականացնում է «Մրրո» հայ ազգային  արվեստի կենտրոնը, այս տարի տոնում է հոբելյանական 10-ամյակը:

Փառատոնի հիմնադիր-ղեկավար, ՀՀ վաստակավոր արտիստ Արսեն Գրիգորյանի երազանքն է եղել, ստեղծել այնպիսի փառատոն, որը կմեկտեղի Հայկական ազգային, ավանդական երգի-պարի  խմբերին: Եվ ահա, արդեն 10 տարի է նրա երազանքն իրականություն է: Փառատոնին մասնակցում են ավանդական երգ ու պարի լավագույն խմբերը, յուրաքանչյուր տարի շուրջ 20  խումբ` թվով 400 և ավել մասնակից-արտիստ ելույթ են ունենում «Գութանի» բեմում: Փառատոնի յուրահատկություններից է բացումը, որի ընթացքում բոլոր խմբերը միասին ելույթ են ունենում միասնական երգով. այդ մոգական պահին, երբ մոտ 400 արտիստ բեմում է` իրենց տարազներով, բեմը ստանում է հայկական գորգի  պատկեր, հյուսված միասնական ուժով:

Փառատոնից հայտնում են, որ oգոստոսի 31-ին կայանալիք փառատոնի մասնակից խմբերն են`
«Ակունք», «Կարին», «Սասնա Ծռեր», «Վան», «Տարոնցիներ», «Նուբար»,«Վերադարձ», «Մասունք», «Տավրոս»/Մասիս/, «Գորանի»,  «Արեգ»,  «Սեբաստացիներ», «Մարաթուկցիներ», «Արդվին», «Ծիլք»,  «Ծովակ», Արցախի «Մենք ենք մեր սարերը»:

Յուրաքանչյուր տարի «Գութան» փառատոնը համալրվում է նոր մասնակից խմբերով: Այս տարի Գութանի բեմում առաջին անգամ ելույթ է ունենալու «Ծովակ» խումբը:

«Ի՞նչու «Գութան». հիմնադիր-ղեկավար Արսեն Գրիգորյանը երկար չի մտածել, քանի որ նրա խոսքով գութանը արարման գործիք է և անմիջական կապ ունի մեր արարող տեսակի հետ: Եվ պատահական չէ, որ Գութաներգերը մեծ տեղ են գրավում մեր ազգային երգարվեստում:  Ահա այս ամենից ելնելով Փառատոնը ստացավ իր անվանումը` «Գութան»:  Ինչպես գութանն է հողը հերկում` բարիք ստեղծելու համար, այնպես էլ Փառատոնի նպատակն ու գործունեութբունն է` հող պարարտեցնել ազգային մշակույթի պահպանման և շարունակման համար:

Փառատոնի նպատակն է պահպանել և տարածել հայկական ազգային-ավանդական երգերն ու պարերը, այն ավելի ճանաչելի դարձնել երիտասարդներին ու փոխանցել սերնդեսերունդ:  
Փառատոնն իրականացվում է հիմքում ունենալով կարևորագույն սկզբունքներ. Ավանդական երգերի-պարերի ներկայացում իրենց էթնիկ տարբերակով՝ առանց որև էժամանակակից մշակումների: Փառատոնի սկզբունքներից է նաև օգտագործել բացառապես ազգային նվագարաններ` դուդուկ, բլուլ, շվի, զուռնա, պկու, կոպալ, դհոլ  և այլն: Գութանի նպատակն է նպաստել, ներդրում ունենալ հայկական ազգային հնչերանգի ու ձայներանգի պահպանման կարևոր գործում»,- նշում են փառատոնի մամուլի ծառայությունից։ 

«Գութան» փառատոնի ընթացքում ցուցադրվում են կարճամետրաժ տեսաֆիլմեր` հայ երգի ու պարի երախտավորների գործունեությանը վերաբերող: Սա ևս Փառատոնի որդեգրած սկզբունքներից է` արժևորելով նրանց գործունեությունն ու մեզ փոխանցված ավանդը:
«Գութան» Հայաստանի ազգային-ավանդական երգի-պարի ամենամյա փառատոնն այս տարիներին իրականացվել է Երևանում, Տավուշում և Արցախում:

Փառատոնը մշտապես տեղի է ունենում բացօթյա․ Երևանում՝  Գաֆէսճեան քանդակների պարտեզում(Կասկադ):  Փառատոնի բացօթյա և անվճար լինելու նպատակն է հասարակության լայն շրջանակներին, այդ թվում Հայաստան ժամանած զբոսաշրջիկներին հասանելի լինելը:   Փառատոնի ձևաչափի կարևոր մաս է կազմում նաև նախափառատոնային ինտերակտիվ համերգները՝ Երևանի վարչական շրջաններում և մարզերի գյուղական համայնքներում: