Ձեր վստահելի աղբյուրը

Ջերմուկ առողջարանային քաղաքում ամռան ամիսներին, մասնավորապես հունիսի 15-ից օգոստոսի 20-ն ընկած ժամանակահատվում, զբոսաշրջային ակտիվություն եղել է, սակայն նախորդ տարվա նույն շրջանի համեմատ, որոշակի նվազում է նկատվում։ Panorama.am-ի հետ զրույցում ասաց Ջերմուկի զբոսաշրջության զարգացման կենտրոնի-Visit Jermuk զբոսաշրջանային տեղեկատվական հարթակի հիմնադիր տնօրեն Նարեկ Միրզոյանը։

Ըստ նրա, նվազման միտումը մի շարք պատճառներով կարող է պայմանավորված լինել, այդ թվում մարդկանց հետաքրքրությունները, նախասիրությունները փոխվել են։

Ջերմուկ քաղաք այցելուների մեջ մեծ թիվ են կազմում օտարերկրացիները, հիմնականում Ռուսաստանի քաղաքացիներ։

«Բավականին ակտիվություն է նկատվում նաև եվրոպական երկրներից՝ Ֆրանսիա, Գերմանիա։ Այս տարի Իտալիայից ունեցանք բավական թվով զբոսաշրջիկներ։ Երբ հարցնում էինք՝ ինչու են նախընտրել Ջերմուկը, ասում էին՝ Հայաստանի մշակույթն ու սնունդն է իրենց հետաքրքել, իսկ Ջերմուկը, դրան գումարած, նաև որպես առողջարանային տուրիզմով զարգացող քաղաք։ Նշում էին՝ Ջերմուկի հյուրանոցային, առողջարանային տնտեսություններն այնքան շատ ծառայություններ են առաջարկում,  որ նույնիսկ Իտալիայի լավագույն հյուրանոցներում չեն գտնի»,- ասաց Ն. Միրզոյանը։

Քաղաքում գործում են հյուրանոցային, առողջարանային համալիրներ, փոքր ու միջին քոթեջներ,  վարձակալության է տրվում  բնակարաններ։

«Մի ընթացք եղավ, որ գրեթե բոլոր ռեսուրսներն ամրագրված էին, իսկ օգոստոսի 7-14-ը, նույնիսկ կատակում էինք՝ ընկեր, ծանոթ, բարեկամ խառնելով էլ Ջերմուկի հյուրանոցներում, առողջարաններում ազատ համարներ չեն կարողանում գտնել»,- նշեց Ն.Միրզոյանը։ 

Նա ասաց, որ արդեն սկսում են պատրաստվել սեպտեմբերին, քանի որ այդ ամիս ռուսաստանցի զբոսաշրջիկների մեծ հոսք է սպասվում, արդեն ամրագրումներ կան։