Ձեր վստահելի աղբյուրը

«Հայաստանը  միջազգային հարաբերություններում դարձել է օբյեկտ, առանց մեզ որոշում են, թե ինչ է տեղի ունենալու մեզ հետ»,- ՀՀԿ փոխնախագահ, անազատության մեջ գտնվող Արմեն Աշոտյանի դատական նիստից առաջ լրագրողների հետ զրույցում ասաց «Պատիվ ունեմ» խմբակցության ղեկավար Հայկ Մամիջանյանը:

Նա նշեց, որ որևէ մեկը Հայաստանին  չի ներգրավում որպես իրական բանակցային կողմ. «Հայաստանը որևէ պահանջ չի ներկայացնում գերիների վերադարձի հետ կապված, որևէ քննարկում չի ծավալում ՝ կապված Հայաստանի սուվերեն տարածքը ադրբեջանական զինյալների կողմից լքելու վերաբերյալ:

Փաշինյանն ունակ չի անելու իր գործը թե ապիկարության, թե իր, ենթադրում եմ, այս կամ այն աշխարհաքաղաքական տերերի թելադրանքով, պարտադրանքով»։

Հայկ Մամիջանյանն ընդգծեց, որ ընդդիմությունը պետք է օր ու գիշեր աշխատի,  ինչը փորձում է անել, հնարավորինս շատ  մարդկանց իրականությունը ցույց տալու, խաբկանքից դուրս  հանելու համար։

«Փաշինյանի հեռացման համար անհրաժեշտ է հանրության շատ լայն կոնսոլիդացիա։ Դրան հասնելու համար ընդդիմությունը պետք է օգտագործի օրենքով թույլատրված բոլոր միջոցները։ Հուսամ, դրա արդյունքները շուտով տեսանելի կլինեն»,- ասաց Հայկ Մամիջանյանը։