Ձեր վստահելի աղբյուրը

«Օրեր առաջ հեռախոսազրույց եմ ունեցել Ռուսաստանի գյուղատնտեսության նախարարի և «Ռոսսելխոզնադզորի» ղեկավարի հետ, բարձրաձայնվել են բոլոր խնդիրները: Դրանք քննարկվում են աշխատանքային կարգով»,- ԱԺ տարածաշրջանային և եվրասիական ինտեգրման հարցերի մշտական հանձնաժողովի նիստում ասաց էկոնոմիկայի նախարար Գևորգ Պապոյանը՝ պատասխանելով հանձնաժողովի անդամ, «Հայաստան» խմբակցության պատգամավոր Ագնեսա Խամոյանի հարցերին՝ օրեր առաջ Հայաստանից արտահանված ելակի մեջ հայտնաբերված պեստիցիդների առկայության, ինչպես նաև ոչ անվտանգ  կոնյակի մասին։

Պապոյանի տեղեկացմամբ, եղել է մի մեքենա, որի մեջ եղել են ելակներ, որոնք խնդիրներ են ունեցել: «Մենք հիմա Բագրատաշենում լաբորատորիա ենք հավատարմագրել, որը մի մեքենա դեղձ երեկ չի թողել արտահանել»,- ասաց Պապոյանը։ Նա նշեց, որ նշված լաբորատորիայի գործունեության արդյունքում էականորեն կրճատվելու է խնդրահարույց արտադրանքի արտահանումը:

Ինչ վերաբերում է կոնյակին, ապա Գ.Պապոյանը հայտնեց է, որ որևէ պաշտոնական մեկնաբանություն այս կապակցությամբ չի եղել:

Ըստ Պապոյանի ներկայացրած վիճակագրական տվյալների, հունվար-հունիս ամիսներին Հայաստանի և Ռուսաստանի միջև առևտրաշրջանառությունը կազմել է մոտ 8.4 մլրդ դոլար, որը նախորդ տարվա նույն ժամանակահատվածի համար աճել է 2.6 անգամ: Սրա մեջ մտնում է նաև գազը, որի ծավալը կրճատվել է, քանի որ այլընտրանքային էներգիայի միջոցները, օրինակ՝ արևային, գնալով ավելանում են:

Արտահանման մեջ ալկոհոլային խմիչքները երրորդ տեղում են, որի մեջ մեծ մասնաբաժին ունի կոնյակը:

Ագնեսա Խամոյանը հարցը հնչեցնելուց հետո դիմեց նիստին ներկա ՔՊ-ական պատգամավոր Խաչատուր Սուքիասյանին. «Պարոն Սուքիասյան, ես ձեր արձագանքները չեմ կարողանում հասկանալ իմ հարցադրումների հետ կապված։ Խնդրում եմ  իմ հարցադրումների ժամանակ ավելորդ արձագանքներ, ռեպլիկաներ չանել, լա՞վ։

Իմ հարցադրումների ժամանակ ավելորդ  ռեպլիկաներ թույլ մի տվեք ձեզ»։

Խաչատուր Սուքիասյանն էլ արձագանքեց. «Ես չեմ եկել այստեղ լսելու հակապետական, մեր պետությունը որակազրկող, մեր պետությունն ավելի վատ վիճակում ներկայացնող ելույթներ։ Ես եկել եմ այստեղ լսելու, թե ինչ համաձայնագիր են բերել»։

ԱԺ կայքից տեղեկանում ենք, որ ԱԺ տարածաշրջանային և  եվրասիական ինտեգրման հարցերի մշտական հանձնաժողովը նիստում գումարված նիստում քննարկել է ««Եվրասիական տնտեսական միության շրջանակներում գյուղատնտեսական արտադրանքի պահեստային վկայագրերի թողարկման (տրման), շրջանառության եւ մարման կանոնների մասին» համաձայնագիրը վավերացնելու մասին» օրենքի նախագիծը:

Գևորգ Պապոյանի տեղեկացմամբ, համաձայնագրով մասնավորապես սահմանվում են պահեստային վկայագրերի շրջանառության և մարման միասնական մոտեցումները, գյուղատնտեսական արտադրանքի որակական ու քանակական հաշվառման առանձնահատկությունները և պահպանման կանոնները, կարգավորվում են պահեստի և գյուղատնտեսական արտադրանքի սեփականատիրոջ միջև հարաբերությունները, ապահովվում է պահեստային վկայագրերի և պահեստների վերաբերյալ տեղեկատվության հասանելիությունը:

Հաշվի առնելով համաձայնագրի դրույթները՝ ԵԱՏՄ շրջանակում նախատեսվում է պահեստային վկայագրերի թողարկումը (տրամադրումը), շրջանառությունը և մարումն իրականացնել անդամ պետությունների օրենսդրությանը համապատասխան:

Համաձայնագրի գործարկումը կնպաստի ԵԱՏՄ շրջանակում գյուղատնտեսական արտադրանքի պահեստային վկայագրերի օգտագործման փորձի ընդլայնմանը եւ դրանց կայուն շրջանառությանը՝ ապահովելով գյուղատնտեսական արտադրանքի շուկայի գործունեության թափանցիկությունը և զարգացումը:

Հանձնաժողովը դրական եզրակացություն է տվել օրենքի նախագծին: Այն կառաջարկվի ընդգրկել ԱԺ առաջիկա հերթական նիստերի օրակարգի նախագծում: