Ձեր վստահելի աղբյուրը

Արցախի Հանրապետության անկախության օրվա առիթով Արցախի նախագահն ու ղեկավարությունն այցելել են «Եռաբլուր» զինվորական պանթեոն և ծաղիկներ խոնարհել արցախյան պատերազմներում զոհվածների հիշատակին, իսկ Արցախի թեմի առաջնորդ Գերաշնորհ տեր Վրթանես եպիսկոպոս Աբրահամյանը հոգեհանգստի կարգ է մատուցել։

Արցախի թեմի առաջնորդ Գերաշնորհ տեր Վրթանես եպիսկոպոս Աբրահամյանը լրագրողների հետ զրույցում ասաց. «Արցախահայության վերադարձի ամենակարևոր երաշխիքը և միակ գրավականը Արցախի Հանրապետությունն է, պետականությունն է, որը հանդիսանում է ժողովրդին համախմբելու երաշխավորը։

Մեր պետականության հիմքում մեր հերոսների թափած արյունն է։ Մենք իրավական ու բարոյական իրավունք չունենք ոչ միայն չսատարելու, այլև մեր մտքով անգամ չպիտի անցնի, որ Արցախի պետականությունը կարող է հարցականի տակ լինել։ Այս առումով առաջին և միակ գրավականը արցախահայության վերադարձի, Արցախի Հանրապետությունն է»։

Հարցին՝ ինչպե՞ս պետք է կազմակերպվի այդ վերադարձը, Վրթանես Սրբազանը պատասխանեց. «Ես իրավական առումով չեմ կարող դա ասել։ Ես բարոյական կողմն եմ նկարագրում։ Դա կապված է, մի շղթա է, որը չպետք է կտրվի։ Մնացած հարցերով թող քաղաքագետները, իրավաբանները զբաղվեն»։

Հարցին՝ արդյոք հոգևոր մակարդակով բարձրաձայնվում են Արցախում պատմամշակութային հուշարձանների ոչնչացումն Ադրբեջանի կողմից, Արցախի թեմի առաջնորդն ասաց, որ  պատմամշակութային հուշարձանների անվտանգությունը կարող է հոգալ միայն Արցախի ժողովրդի վերադարձը։

Անդրադառնալով Արցախում հայկական հետքը վերացնելու Ադրբեջանի վարած քաղաքականությանը՝ Վրթանես Սրբազանը նշեց, որ այդ քաղաքականությունը նոր չէ և սկսվել է դեռ խորհրդային տարիներին։

«Ադրբեջանը միշտ փորձել և փորձում է Արցախի պատմամշակութային հուշարձանները դարձնել իրենը և կեղծ գործընթացներ էին տեղի ունենում։ Պատահական չէ, որ Խորհրդային Միության ժամանակ միակ տարածքը, որտեղ չէր գործում որևէ եկեղեցի, Արցախն էր», - ասաց Արցախի թեմի առաջնորդը։