Օկամպոյի երկրորդ նամակը հայերին․ «Հայեր, եկեք պաշտպանենք Հայաստանը»
Միջազգային քրեական դատարանի առաջին դատախազ Լուիս Մորենո Օկամպոն երկրորդ բաց նամակն է հղել աշխարհասփյուռ հայերին.
«Երեք խնդիրներ փոխկապակցված են. Հայաստանը շարունակում է մնալ վտանգի տակ, քանի դեռ բանակցություններ են ընթանում Ադրբեջանի հետ խաղաղության պայմանագրի շուրջ, հստակություն չկա, թե ինչպես կարող է 2023 թվականի ցեղասպանության զոհ դարձած Լեռնային Ղարաբաղի ժողովուրդը ապահով վերադառնալ իր նախնիների հողը, իսկ 23 հայ պատանդներ դեռ Բաքվի բանտերում են։
«Ադրբեջանը Բաքվում 2024 թվականի նոյեմբերին հյուրընկալում է COP 29-ը՝ ՄԱԿ-ի Կլիմայի փոփոխության համաժողովը՝ «COP հանուն խաղաղության» անվան տակ։ Եթե հայերը չազատվեն, և COP 29-ին մասնակցող պատվիրակների կողմից անտեսվի Լեռնային Ղարաբաղի հակամարտությունը, նախագահ Ալիևին կտրվի հզոր հարթակ՝ ողջ Հայաստանը զավթելու, իր աշխարհաքաղաքական նկրտումները բարձրացնելու համար:
«Նման սցենարը ոչ միայն կժխտի Լեռնային Ղարաբաղի ցեղասպանությունը և պատանդներին կդատապարտի երկարամյա բանտարկության, այլև ամբողջ համայնքին կթողնի որպես անցյալի մոռացված մասունք, և դա կմեծացնի վտանգը հենց Հայաստանի համար»:
Օկամպոն շարունակում է. «Վերջին ամսվա ընթացքում հազարավոր մարդիկ ավելի քան 30 երկրներից, որոնցից շատերը հայ նախնիներ ունեն, համախմբվել են թվային ֆորումներում և սոցիալական ցանցերում: Ի հավելումն առցանց արշավի, բողոքի ցույցեր անցկացվեցին Երևանից մինչև Տորոնտո՝ պահանջելով վերադարձնել Բաքվում բանտարկված հայ պատանդներին։
«Հիմա ժամանակն է ընդլայնելու շարժումը և կապելու այն ամբողջ աշխարհում որոշում կայացնողների հետ: Ալիևի զոհերը միայն հայերը չեն։ Նա ազդում է շրջակա միջավայրի, ադրբեջանցի քաղաքացիների և նույնիսկ եվրոպացի պատգամավորների վրա: Ադրբեջանը, որ հարստացել է հանածո վառելիքով, առաջատար դիրք է գրավում կլիման վատթարացնող գործոններում: Վարչախումբը ոչնչից չի խորշում։ Այն ճնշում է լրագրողներին, ակադեմիկոսներին, իր սահմաններում ցանկացած այլախոհի։ Ընդամենը մի քանի օր առաջ այն արգելեց 26 երկրների 76 եվրոպացի պատգամավորների մուտքն Ադրբեջան՝ իր կոռուպցիան բացահայտելու համար։ Բուենոս Այրեսի ավագ դպրոցներ կատարած իմ վերջին այցելության ժամանակ ես հանդիպեցի դեռահասների, ովքեր հասկացան, որ նման գործողությունները խաթարում են իրենց ապագան և ցանկանում են սկսել TikTok արշավներ՝ հասնելու իրենց հասակակիցներին ամբողջ աշխարհում:
«Հաջորդ քայլը կլինի COP 29-ի պատվիրակներից պահանջել բարձրաձայնել այս հարցերը, այդ թվում՝ Ալիևի՝ հանածո էներգիայի եկամուտները օրինականացնելու, Լեռնային Ղարաբաղի ցեղասպանության, Եվրոպայի և ԱՄՆ-ի քաղաքական համակարգերը կոռումպացնելու, քաղբանտարկյալների ու Բաքվի հայ պատանդների վերաբերյալ»։
Օկամպոն եզրափակում է. «Հայեր, եկեք պաշտպանենք Հայաստանը և առաջնորդենք աշխարհը դեպի իսկապես խաղաղ COP29»:
Լրահոս
Տեսանյութեր
Հայոց ցեղասպանության պատմությանն էլ պետք է վերադառնանք, հասկանանք՝ ինչ է տեղի ունեցել և ինչու
