Ձեր վստահելի աղբյուրը

«Արցախահայության վերադարձի մասին խոսելիս՝ կարևոր հանգամանք, խոսքը հավաքական վերադարձի մասին է, ոչ երբեք անհատական։ Անհատական վերադարձ չի կարող լինել»,- «Սրբազան պայքար» շարժման  կազմակերպած «Դեպի կայուն և երկարարաժամկետ խաղաղություն» խորագրով պանելային քննարկմանն ասաց Արցախի ՄԻՊ Գեղամ Ստեփանյանը:

Միաժամանակ նա ընդգծեց, որ Հայաստանը առհասարակ փակել է վերադարձի թեման. «Խաղաղություն բանակցողների միջև այդ հարցն ընդհանրապես բացակայում է»։

Գեղամ Ստեփանյանի ներկայացմամբ,  2023 թվականի սեպտեմբերից հետո մոտ 60 մարդ մնացել էր Արցախում, այսօր Արցախում մնացել է 14 հայ:

«Անգամ անձինք, որ ժամանակին ինչ-որ հույս ունեին, որ կարող են մնալ ու ապրել Ադրբեջանի կազմում, ի վերջո եկել են այն համոզման, որ դա անհնար է և հետագայում դիմել են Կարմիր Խաչին՝ խնդրելով իրենց տեղափոխել Հայաստանի Հանրապետություն: Սա ևս ցուցիչ է, սա ևս պետք է օգտագործել.  լավ, եթե ասում եք 120 հազար վերցրել ու դուրս եք եկել ձեր տներից, գոնե կան մարդիկ, ովքեր մնացել են և  ևս մեկ անգամ համոզվելով, որ անհնարին է, տեղափոխվել են Հայաստան»,- ասաց նա:

Ստեփանյանը խոսեց իր բնորոշմամբ  «մի շատ վտանգավոր պրոցեսի մասին».  խոսակցություն կա, որ միջազգային դատական ատյաններից հայցերն են հետ կանչում:

«Հայաստանի, օտարերկրյա բազմաթիվ իրավապաշտպան կազմակերպություններ կոչ են արել, որ սա չի կարող երբեք տեղի ունենալ, քանի որ սա խարխլում է հակամարտությունների կարգավորման արդարացի և պատշաճ ընթացակարգը: Սակայն առնվազն մինչև այս պահը տեսնում ենք, որ Հայաստանի իշխանության դիրքորոշումը շարունակում է նույնը մնալ:

Որդեգրված է մի դիրքորոշում, որ եթե ամեն գնով հասան խաղաղության  պայմանագրին, ապա այս հարցը փակվում է: Սա ուղղակի նշանակում է դավաճանել 150 հազար մարդու իրավունքներին և երես չունենալ հետագայում էլ որևէ մի տեղ որպես ժողովուրդ, ազգ ներկայանալու՝ ասելով, որ այն ժամանակ էլ երբ հնարավորություն կար պաշտպանելու, չենք արել, ուղղակի հավատում էինք խաղաղությանը»,-ասաց Գ. Ստեփանյանը։