Ձեր վստահելի աղբյուրը

Ուկրաինական գինի արտադրողները չեն կարողանում դիմակայել եվրոպական ապրանքանիշերի հետ մրցակցությանը և կառավարությունից պահանջում են նվազեցնել ակցիզային հարկը, ինչպես նաև պատժամիջոցներ սահմանել Հարավային Կովկասի արտադրողների դեմ:

Այս մասին գրում է «Հետք»-ը՝ վկայակոչելով «Укрвинпром» կոնցեռնի գլխավոր տնօրեն Վլադիմիր Կուչերենկոյի հայտարարությունը։

«Խնդիրը հայրենական գինեգործության մրցունակության բացակայությունն է։  Ուկրաինան գնում է եվրաինտեգրման ուղղությամբ, սակայն նույն «Արտադրված է Ուկրաինայում» ծրագրում չգիտես ինչու չի հիշատակվում գինու մասին, թեև այն կարևոր սննդամթերք է։ Եվրոպայում գինու համար սահմանված ակցիզային հարկը նվազագույնն է, մինչդեռ Ուկրաինայում փրփրուն գինիների համար այն կազմում է 12,23 գրիվնա (մոտ 0,3 դոլար), ուստի նման ֆիսկալ պայմաններում ներմուծվող ապրանքների հետ մրցակցությունն ուղղակի անիրատեսական է»,- հայտարարել է Կուչերենկոն։

Նրա խոսքով՝ խնդրի լուծման տարբերակներից մեկը գինու ակցիզային հարկի իջեցումն է եվրոպական մակարդակի։ Սակայն, որպես օգնող գործողություն, նա առաջարկել է նվազեցնել մրցակցությունը՝ պատժամիջոցներ սահմանելով Հարավային Կովկասից արտադրողների դեմ։

«Հասկանալի է, որ գինեգործները կառավարությունից աջակցություն են ակնկալում։ «Укрвинпром»-ն արդեն մեկ տարի է, ինչ խնդրում է պետությանը պատժամիջոցներ կիրառել Վրաստանից և Հայաստանից գինու և կոնյակի մի շարք արտադրողների դեմ, որոնց արտադրանքը դեռևս մատակարարվում է ռուսական շուկա: Չնայած խոստումներին, այդ ապրանքները շարունակում են վաճառվել նաև մեզ մոտ»,- հավելել է նա։