Ձեր վստահելի աղբյուրը

Ավելի քան 28 տարի Արցախի Հանրապետության Շուշի քաղաքում, այնուհետև Ստեփանակերտում գործունեության ծավալած Շուշիի «Վարանդա» մանկակապատանեկան, երիտասարդական պետական երգչախումբն այսօր սկսել է իր գործունեությունը Հայաստանում։

Երգչախումբը հիմնադրվել է լիբանանահայ երաժիշտ Զաքար Քեշիշյանի կողմից։ Շուրջ 30 տարի ամռան  ամիսներին Զաքար Քեշիշյանը եղել է Արցախում։ 2004-ից  Արցախի պատվո քաղաքացի է:

Զաքար Քեշիշյանը դասախոսում է Լիբանանում պետական կոնսերվատորիայում,  Բարսեղ Կանաչյանի անվան երաժշտական քոլեջում, լիբանանյան Հայկազյան համալսարանում, ղեկավարում մի քանի երգչախմբեր։

Այժմ «Վարանդա» մանկապատանեկան երգչախումբը, որն ամբողջությամբ բաղկացած է արցախցիներից, «Երգող Արցախ» վերնագրով համերգային ծրագրեր է իրականացում Հայաստանի տարբեր շրջաններում։  Սեպտեմբերի 6-ին Վաղարշապատի Մակար Եկմալյանի անվան առաջին երաժշտական դպրոցում է ելույթ ունեցել երգչախումբը, իսկ սեպտեմբերի 13-ին՝ Կամերային երաժշտության տանը կկայանա համերգ: Մուտքն ազատ է։

Panorama.am-ի հետ զրույցում «Վարանդա» երգչախմբի գեղարվեստական ղեկավար և խմբավար Զաքար Քեշիշյանն ասաց, որ, իհարկե, հեշտ չէր Հայաստանում վերսկսել գործունեությունը,  բայց հենց երգչախմբի անդամներն են դիմել իրեն ու առաջարկել Հայաստանում իրականացնել «Երգող Արցախ» երգչախմբային ծրագիրը։

«Արցախում մենք ունեինք մեր փորձասենյակը, դահլիճը, տարազներ, պետական ֆինանսավորում։ Այս բոլորից առավել կարևոր էր, որ մենք մեր միջավայրում էինք, որի համար ստեղծված էր երգչախումբը և գործում էր։

2021, 2022 թվականի ամռան ամիսներին մենք մեր գործունեությունը շարունակում էինք Ստեփանակերտում։ Այնտեղ մեզ միացան Արցախի տարբեր շրջաններից սաներ ու կազմվեց 120 հոգանոց երգչախումբ։ Երկու տարի նոր երգացանկերով համերգներ ունեցանք Ստեփանակերտում։

Իսկ արդեն Արցախից բռնի տեղահանությունից հետո երգչախմբի երեխաները գրում էին՝  պարոն Զաքար, արդյո՞ք գալու եք Հայաստանում, գոնե իրագործենք մեր ծրագիրը Հայաստանում»,- պատմեց Զ. Քեշիշյանը։

Նա նախ պարզել է, որ երեխաների մեծ մասը բնակվում է  Երևանում, Աբովյանում ու Մասիսում։  Ընդհանուր առմամբ, հավաքվել է 120 հոգանոց երգչախմբից 60 հոգի։ Շաբաթական 4 փորձ Երաժշական ընկերության տրամադրած դահլիճում ու համերգայի նոր ծրագիրը՝ 16 նոր երգով, պատրաստ է։

«Երգող Արցախ» համերգային ծրագրի ընթացում հնչում են կատակ երգեր, որը, Զ. Քեշիշյանի խոսքով, այսօր շատ պետք է այդ երեխաներին, որը նույնպես նրանց վիճակը մեղմելու տարբերակներից է, և հայրենասիրական խմբերգեր։ 

«Այս կարճ ժամանակահատվածում այս ամենը սովորելը, հասցնելը  խոսում է Արցախի երեխաների ընդունակության մասին»,- ասաց Զ.Քեշիշյանը։

Նա նշեց, որ իր համար բավականին դժվար էր երեխաների հետ առաջին հանդիպումը. «Ինձ դժվար էր գնալ ու հանդիպել այդ երեխաներին։ Գնամ՝ ի՞նչ ասեմ նրանց։ Ոտքերս առաջ չէին գնում։ Բայց հանդիպեցինք, փաթաթվեցինք ու այդ սառույցը հալվեց»։

Երգչախմբին՝ գործունեությունը վերսկսելու ու համերգներ կազմակերպելու համար հովանավորում է Արևելյան Ամերիկայի Կիլիկյան թեմի առաջնորդարանը։

«Թեմի առաջնորդ Անուշավան սրբազանը հարցրեց ինձ, թե «Վարանդա» երգչախմբի գործենության հետ կապված ի՞նչ եմ մտածում։ Ասաց, որ եթե  ծրագիր իրականացնեք, թեմն անպայման կաջակցի։ Մեծածախ ծրագիր է։ Մեզ պետք էին նոր տարազներ, քանի որ մեր ամբողջ զգեստերը մնացել էին Արցախում»,- ասաց խմբի գեղարվեստական ղեկավարը։

Նա նշեց, որ Ստեփանակերտում իրենց փորձասենյակը գտնվում էր մշակույթի պալատի վերջին հարկում, որը ռմբակոծվել էր, դահլիճը քանդվել էր։

Օգոստոսի 28-ին Կոմիտասի թանգարան-ինստիտուտի համերգասրահում կայացել էր սրնգահար Զաքար Քեշիշյանի մենահամերգը։  Նվագակցել է դաշնակահար Նադեժդա Հակոբյանը։ Զաքար Քեշիշյանը շվիով և դուդուկով կատարել է ժողովրդական եղանակների մշակումներ և շվիի համար փոխադրումներ, հայտնի կոմպոզտորների ստեղծագործություններ։

«Ես նպատակ ունի այս համերգի միջոցով հավաքել արցախցիներին, մտավորականներին ու հայտարարել «Վարանդա» երգչախմբի առաջիկա համերգների մասին»,- ասաց Զ. Քեշիշյանը։