Ձեր վստահելի աղբյուրը

Երևանի ընդհանուր իրավասության առաջի ատյանի դատարանի Կենտրոն նստավայրում , դատավոր Տաթևիկ Գրիգորյանի նախագահությամբ, ավարտվեց  արդարադատության նախկին նախարար, Սահմանադրական դատարանի նախկին նախագահ, ՍԴ դատավոր Հրայր Թովմասյանի գործով դատավարությունը։

Հաջորդ դատական նիստը սպասվում է  վաղը՝ սեպտեմբերի 13-ին, ժամը 11։30-ին։

«Այս ողջ քրեական գործը, անկախ հիմքերից, դրդապատճառներից, վստահեցնում եմ՝ առնվազն տասը մահացու հիվանդություն ունի։ Դրանցից մեկի առկայությունը բավարարել է, որպեսզի այս քրեական գործը մահանա, կարճվի։ Բայց դեռ 4,5 տարի է դեռ արհեստական շնչառություն ենք տալիս, արյուն ենք տալիս, ամեն կերպ բրդում ենք՝ էս գործը բերել և հասցնել ինչ-որ հանգրվանի։ Ինձ համար այդ բոլոր մոտիվները պարզ են, բայց որպեսզի չլինի, որ ուղղակի հայտարարում  էի, հիմա անցանք փաստերի դաշտ և ես մեկ առ մեկ կասեմ»,- նիստի ավարտից հետո լրագրողների հետ զրույցում ասաց Հրայր Թովմասյանը։

Թովմասյանն ընդգծեց, որ հանգիստ իրականացնում է իր պաշտպանությունը։

«Սրանից հետո կխոսենք փաստերի լեզվով»,- ասաց նա։

Հիշեցնենք, որ ՍԴ նախկին նախագահ, ՍԴ դատավոր Հրայր Թովմասյանի վերաբերյալ քրեական գործը Երևանի ընդհանուր իրավասության դատարանի դատավոր Տաթևիկ Գրիգորյանի վարույթում է 2020թ․ մարտ ամսից։ Թովմասյանը մեղադրվում է ՀՀ քրեական օրենսգրքի (2003թ․) 308-րդ հոդվածի հատկանիշներով՝ պաշտոնեական լիազորությունները չարաշահելու մեջ։ 

Ավելի մանրամասն՝ տեսանյութում։