Ձեր վստահելի աղբյուրը

«Մենք Մյուռոնօրհնության և  Մայր տաճարի վերաօծման արարողություններին մասնակցության
հրավերներ ուղղել ենք իշխանություններին, այս պահի դրությամբ իրենց մասնակցության վերաբերյալ սպառիչ պատասխաններ չունենք: Միայն Ազգային ժողովի նախագահի կողմից է սպառիչ պատասխան տրվել, որ չի մասնակցելու», - լրագրողների հետ հանդիպմանն ասաց Գերաշնորհ Տեր Արշակ արքեպիսկոպոս Խաչատրյանը՝ պատասխանելով հարցին՝ արդյոք իշխանություններին հրավիրել են Մյուռոնօրհնության և Մայր տաճարի վերաօծման արարողությանը:

Հարցին՝ ինչո՞ւ են հրավիրել, Արշակ Սրբազանը պատասխանեց. «Անկեղծ ասեմ՝ մեզ մոտ էլ կային տարակույսներ իշխանություններին հրավիրել-չհրավիրելու հետ կապված՝ պայմանավորված եկեղեցու և իշխանությունների հարաբերությունների ներկա բնույթով:

Հաշվի առնելով հենց այդ հանգամանքը՝ իշխանություններին հրավիրելու նպատակահարմարության խնդիրը քննարկվել է եկեղեցում ամենաբարձր մակարդակով՝ Գերագույն հոգևոր խորհրդի ժողովում:

Գերագույն հոգևոր խորհրդի ժողովը վերջնական եզրակացության է եկել, որ այո, պետք է հրավերներն ուղղել։

Միջոցառումներին, համազգային արարողություններին իշխանություններին հրավիրելը բացարձակապես չպետք է մեկնաբանել այն իմաստով, որ եկեղեցին հրաժարվել է իր դիրքորոշումներից և եկեղեցին ամբողջական լոյալություն է դրսևորում այն քաղաքական գծի նկատմամբ, որն որդեգրված է իշխանությունների կողմից: Եկեղեցին շարունակելու է իր դիրքորոշումները, իր մտահոգություններն արտահայտել բոլոր այն դեպքերում, երբ դրա անհրաժեշտությունը կգտնի», - ասաց Արշակ Սրբազանը։

Գերաշնորհ Տեր Արշակ արքեպիսկոպոս Խաչատրյանը նաև ասաց. «Հայաստանի անկախության պատմության շրջանում, ողջ եկեղեցու պատմության ընթացքում եկեղեցին աջակից է եղել պետությանը, իշխանություններին։ Այո, երբեմն մենք տարբերակում ենք իշխանությունը պետությունից, բայց այդ սահմանագիծը շատ նուրբ է։ Չափազանց  դժվար է իշխանությունների նկատմամբ քննադատություն ուղղել առանց մտահոգություն ունենալու, որ պետությանը չես վնասի, բայց երբ իրավիճակը հասնում է այնպիսի հանգրվանի, երբ այլընտրանք չկա, նշանակում է՝  պետք է գնալ այդ ճանապարհով։

Եկեղեցին միշտ պատրաստակաամություն ունեցել է աջակցել իշխանություններին։ Վկան՝ վերջին 30 տարիների պատմությունը, որի համար մեզ երբեմն մեղադրել են իշխանահաճության մեջ, բայց մեզ առաջնորդող գաղափարը բացարձակապես իշխանահաճությունը չի եղել, եղել է  նեցուկ դառնալ իշխանություններին լուծելու այն գոյաբանական հիմնախնդիրները, որոնք ծառացած են եղել մեր առջև, որոնցից առաջինը հենց Արցախի հարցն էր»։

Խոսելով Մյուռոնօրհնության և  Մայր տաճարի վերաօծման արարողությունների մասին, Արշակ Սրբազանն ասաց, որ դիմել են Հասարակական կարգի պահպանության պետական կառույցին, ոստիկանությանը, իրենք պատրաստակամություն են հայտնել աջակցելու աշխատանքներին։ 

Սրբազանը նաև հայտնեց, որ հրավիրել են Էջմիածնի քաղաքապետին, բայց չգիտեն՝ կգա, թե ոչ. «Քաղաքապետարանը որոշակի ներգրավածություն ունեցել է արարողությունների նախապատրաստական աշխատանքների մեջ։ 

Իհարկե, նորմալ հարաբերությունների պայմաններում այդ ներգրավածությունն ավելի զգալի, ավելի մեծ կլիներ, բայց հաշվի առնելով ներկա վիճակը, այդքան մեծ չի եղել»։ 

Ասուլիսին ներկա Մայր Աթոռ Սուրբ Էջմիածնի Արտաքին հարաբերությունների և արարողակարգի բաժնի տնօրեն Տ. Նաթան արքեպիսկոպոս Հովհաննիսյանն ասաց, որ ունեն բավականին հյուրեր. «Հրավիրված են մեր քույր եկեղեցիների ներկայացուցիչներ։ Ունենք աշխարհիկ հյուրեր։ Որևէ երկրի նախագահի չենք հրավիրել։ Օտարերկրից մասնավոր հրավիրյալներ չունենք՝ քաղաքական գործիչներ և այլն, հրավիրված են Հայաստանում դիվանագիտական ներկայացուցչությունների  ղեկավարները։

Հրավիրված են մեր բարերարները, որոնք մեծ թիվ են, ուխատավորական խմբեր»։ 

Արշակ Սրբազանն ասաց, որ միջոցառումները հրավիրատոմսերով են։

«Վեհափառի տնօրինությամբ Մյուռոնօրհնության և Մայր տաճարի վերաօծմանը հաջորդող շաբաթվա ողջ ընթացում Մայր տաճարում մատուցվելու են պատարագներ»,- հայտնեց Սրբազանը։ 

Հիշեցնենք, որ սեպտեմբերի 28-ին՝ ժամը 17։00-ին Մյուռոնօրհնության արարողությունը կկայանա Սուրբ Տրդատի բաց խորանում, սեպտեմբերի 29-ին՝ ժամը 10։30-ին կկայանա Մայր Տաճարի վերաօծման արարողությունը:

Մանրամասն՝ տեսանյութում։