Ձեր վստահելի աղբյուրը

«Վտանգավոր օբյեկտ է, ասում ենք՝ ձեռք չտաս կպայթի։ Ինքը գնում՝ դատարան է դիմում, վերջինս վարույթ է ընդունում, ասում է պետք է քննարկենք։ Ինչքան կքննարկեն՝ դե 1 տարի, 2 տարի, 3 տարի»,-կառավարության նիստում ասաց Նիկոլ Փաշինյանը՝ հավելելով, որ այդ ընթացքում նման ընկերությունը կարող է նույնիսկ շարունակել աշխատել, կամ նման վտանգավոր օբվյեկտը մնա չկոնսերվացված։

Նա նման միտք հայտնեց «Տեխնիկական անվտանգության ապահովման պետական կարգավորման մասին» օրենքում փոփոխություններ և լրացումներ կատարելու մասին», «Հրդեհային անվտանգության մասին» օրենքում լրացում և փոփոխություն կատարելու մասին» և «Հայաստանի Հանրապետության վարչական դատավարության օրենսգրքում լրացում կատարելու մասին» Հայաստանի Հանրապետության օրենքների նախագծերին հավանություն տալու մասին փաթեթի քննարկման ժամանակ։

Փաշինյանն ասաց, որ առաջարկվող նոր օրենսդրական կարգավորումներով հակառակ գործընթաց  է սկսվելու, երբ արձանագրվի խախտումը, ապա նման օբյեկտը պետք է տեղում փակվի։

«Եթե պարզվի, որ սխալ ենք փակել, ապա մենք տնտեսվարողի կրած վնասը դատական կարգով կփոխհատուցենք։ Բայց ավելի լավ է այսպիսի ռիսկ ավելացնենք, քան թե ռիսկ առաջացնենք, որ մարդիկ կզոհվեն, որովհետև հասցված վնասն էլ ոչ ոք չի կարող կոմպենսացնել»,-հայտարարեց Փաշինյանը և հավելեց. «Մենք լեգիտիմ ամենաթողության խողովակ ենք ստեղծել։  Ասում են՝ տուգանում ես՝ խնդիր չկա, ինչքան է տուգանքդ, 100 հազար դրամ, 200, 300 կամ 1 մլն դրամ՝ դու խնդիր չունես, վերցրու, ու ես կրկին իմ գործողությունը շարունակում եմ... Հիմա պետությունը պահանջելու է չշահագործվող բենզալցակայանը կոնսերվացնել, եթե այն չանի ապա պետությունը մասնագիտական կառույցի կպատվիրի այն անել՝ հետագայում ընկերությունից դատական կարգով գումարը բռնագանձելու կարգավորմամբ»։

Տեսչական մրմնի ղեկավար Պետրոս Մարտիրոսյանը նշեց, որ գործող կարգավորումներով, եթե տնտեսվարողի մոտ խախտում է արձանագրվում, ապա վերջինս բողոքարկում է և մինչև հարցի քննարկումը կարող է շարունակել գործունեությունը, կամ վճարել տույժը և շարունակել։

Մարտիրոսյանն ասաց, որ առաջարկվող օրինագծով Տեսչական մարմնի արգելող ակտը ենթական է անհապաղ կատարման և այն վերաբերում է արտադրական վտանգավոր օբյեկտներին, դրանցում տեղադրված առանձին տեխնիկական միջոցին կամ տեխնոլոգիական արտադրության շահագործումը արգելով կարգադրագրերին, իսկ երկրորդ կետով՝ կազմակերպությունների շենքերի շինությունների ամբողջովին կամ մասնակի դադարեցման որոշումներին, եթե հրդեհային անվտանգության կանոնների խախտումն անմիջական վտանգ են ներկայացնում մարդկանց անվտանգության համար։

Նա նշեց, որ նախագծով նախատեսվում է պարտադիր կոնսերվացում իրականացվի նման գործունեության համար, ինչպես նաև  կասեցված օբյեկտի կոնսերվացմանը։

«Նախկինում տեղում ստուգման արդյունքում 208 բենզալցակայանների գործունեությունը դադարեցվել է, որից 54-ն առհասարակ ապամոնտաժվել են 40-ից ավելն արդեն իրենց խախտումները վերացրել և աշխատում են, մնացածի մասով տեսչական մարմինը նոր տեղեկություն չունի, թե արդյո՞ք թերությունները վերացրել են և ցանկանո՞ւմ են շարունակել աշխատել»,- հայտնեց տեսչական մարմնի ղեկավարը՝ նշելով, թե կարող է լինել դեպքեր, երբ տևական ժամանակ չշահագործեն բենզալցակայանը և այն շարունակի մնալ արտադրական վտանգավոր օբյեկտ։