Ձեր վստահելի աղբյուրը

Անկախության հռչակագրում զետեղված են մեր ժողովրդի երազանքները, ազգային տեսլականը։  Անկախությունն անգնահատելի արժեք է, որը մեր ժողովուրդը ավելի քան երեք տասնամյակ պահպանում է արյան գնով։ ՀԱԿ փոխնախագահ Արամ Մանուկյանը, որն ընթերցել է ՀՀ անկախության հռչակագիրը, Panorama.am-ի հետ զրույցում նշեց, որ, այդուհանդերձ, այսօր հասարակությունն իրեն անկախության լիարժեք տեր չի զգում այն չափով, որքանով կցանկանար ինքը տեսնել։

«25 տարի այնքան աղբ են լցրել մեր ժողովրդի գլխին և հակաանկախական քարոզ տարել, որ կոմպլեքսները, որոնք կային մինչև շարժումը, վերականգնվել են ժողովրդի մոտ՝ «մեզ տեր է պետք», «մեզ պետք է մեկը փրկի», «մենք ոչինչով մեղավոր չենք», «ուրիշներն են մեզ բերել այս դժբախտություններն ու պարտությունները», որով մեր ժողովրդին բերել են ինքնամերժման։ Արդյունքում՝  հասարկությունը չի տեսնում , որ ինքն  է իր երկրի տերը և պատրաստ է դրա համար զոհաբերվել։ Այս առումով շատ դժվար է և «Ավգյան ախոռներ» կան մաքրելու, քաղաքացու մեջ ձգտումն ու արժանապատվության զգացողությունը խեղդված  են»,- ասաց Մանուկյանը։

Նրա գնահատմամբ,թեև հիմա շատ դժվար է լինելու հասարակության շրջանում մաքրել կարծրացած մտքերը, սակայն անհնարին ոչինչ չկա։ Նա հավատացաց է, որ կորցրածը հնարավոր է վերադարձնել։

«Անկախության զգացողությունը բնազդային զգացողություն է ՝ լավ և ինքնուրույն ապրելու։ Այն ոչ մի ազգի մոտ երբեք չի վերանում։ Այն կարող է քչանալ, խեղճանալ, բայց երբեք չի ոչնչանում։ Եթե այդ բջիջների վրա աշխատանք տարվի՝ մարդկանց, դպրոցականներին, ուսանողներին ոգեշնչեն, բացատրեն դրա կարևորությունը, ես լավատես եմ, եթե 88-ին կարողացանք այդպիսի հասարություն ունենալ, որ 2 մլն քվեով կերտեց իր անկախությունը, ապա խելոք, գրագետ և հետևողական աշխատելու դեպքում՝ կարող ենք այդ արդյունքն ունենալ։ Այսինքն՝ կորուստներ ունենք կամ կորուտների ճանապարհին ենք, բայց այն անվերադարձ չէ»,- հավելեց Մանուկյանը։

Հարցին,թե Անկախության հռչակագրի փատաթղթի հետ կապված հնարավոր փոփոխություններին ինչպե՞ս եք վերաբերում, արդյո՞ք, Սահմանադրության հետ համատեղելիության խնդիրներ ունենք, Մանուկյանն ասաց․ « Չկա այդպիսի խնդիր, դա բլեֆ է, ադրբեջանցիների պահանջն է, որին 100 տոկոսով իր համաձայնությունն է արտահայտում Նիկոլ Փաշինյանը։ Նրա բոլոր գործողություններն են Ադրբեջանի ու Թուրքիայի կողմից թելադրվում, միայն թե կարողանա իշխանություն պահել , Արևմուտքի պահանջներին համընթաց լինի, Թուրքիայի՝ ատոմակայանի, էկոլոգիայի, սահմանների, մետալուրգիական գործարանի չկառուցման և այլ բազմաշերտ պահանջներին  համահունչ լինեն, քանի որ այդ մարդկանց խոսնակը մեր երկրի իշխանավորն է։ Սա Հայաստանի նվաստացման ճանապարհ է, ոչ թե՝ քաղաքականություն կամ «խաղաղության օրակարգ»։ Դրանք բլեֆ առաջարկներ են, որոնք խաղաղության հետ կապ չունեն»։

Մանուկյանի համոզմամբ՝ Նիկոլ Փաշինյանն այսօր «օգտակար» գործիչ է ադրբեջանցիների համար, քանի որ հերթով կատարում է իրենց պահանջները։

«Իրենք շատ լավ բռնել են այդ գիծը, քանի որ Նիկոլ Փաշինյանն ուղղակի համաձայն է այդ պահանջներին։  Իսկ իրավաբանական առումով՝ ասենք,թե Սահմանադրությունից այդ հռչակագիրը հանվեց, դրանից հետո այն չի՞ մնում որպես հիմնարար փաստաթուղթ՝ ծննդական մեր երկրի ստեղծման համար։ Մնալու է չէ, ի՞նչ եք անելու, ուտելո՞ւ եք այդ փաստաթուղթը, չէ որ Անկախության հռչակագիր կա։ Դրանք պատրվակներ են և լինելու են այնքան ժամանակ, քանի դեռ Նիկոլն իշխանության է և անընդհատ զիջելու է։ Մեր ժողովրդի մեղքն էլ այն է, որ այդ պարտված իշխանությանը ձայն տվեց։ Պարտված իշխանությանը ձայն տալով տեր կանգնեցինք պարտությանը, ինչը երազային կարող էր լինել Ադրբեջանի և Թուրքիայի համար»,- ասաց Մանուկյանը։

Հարցազրույցն ամբողջությամբ կարող եք լսել հղմամբ։