Ձեր վստահելի աղբյուրը

Լիբանանում փեյջերների և հեռահաղորդակցության միջոցների պայթյունը իսրայելական հետախուզական ծառայությունների մի քանի տարի ծրագրված գործողության մի մասն էր, որոնք ժամանակից շուտ են ակտիվացրել կապի սարքերի պայթուցիչները՝ վախենալով, որ «Հեզբոլլահը» կիմանա մոտալուտ գործողության մասին և կփորձի խափանել այն։ Գազետա.ռու-ի հաղորդմամբ, այս մասին գրում է The Washington Post-ը՝ փորձագետներին հղումով։

Թերթի աղբյուրները «Մոսադի» օպերացիան նկարագրել են որպես «կարմիր կոճակի» կիրառում` թաքուն ներթափանցում թշնամու համակարգ, որը կարող էր ամիսներ կամ տարիներ շարունակ պասիվ մնալ մինչև ակտիվացումը:

Փորձագետները կարծում են, որ Իսրայելը սեղմել է կոճակը, քանի որ վտանգ է եղել, որ պայթուցիկները հնարավոր է հայտնաբերվեն։  Նրանք նշել են, որ, որպես կանոն, «կարմիր կոճակի» օգտագործումը հանդիսանում է հետագա լայնածավալ հարձակման նախերգանք, սակայն այս դեպքում դրա ակտիվացումը կարող է պայմանավորված լինել գործողության հնարավոր խափանման վերաբերյալ մտահոգությամբ։

Սեպտեմբերի 17-ի երեկոյան պայթել են «Հեզբոլլահի» հազարավոր անդամների անձնական փեյջերները։ Դրա հետևանքով, առնվազն 4000 մարդ տուժել է, 12-ի կյանքը չի հաջողվել փրկել, այդ թվում՝ 8-ամյա երեխայի։ Լիբանանի իշխանությունները տեղի ունեցածն անվանել են «իսրայելական ագրեսիա»։ Սեպտեմբերի 18-ին Լիբանանում տեղի են ունեցել այլ սարքերի, այդ թվում՝ ռացիաների և կենցաղային տեխնիկայի զանգվածային պայթյուններ։ Այս պայթյունների հետևանքով տուժել է ավելի քան 600 մարդ, որոնցից 25-ի կյանքը բժիշկները չեն կարողացել փրկել։