Ձեր վստահելի աղբյուրը

«Չի կարող որևէ միջազգային պայմանագիր, որը Սահմանադրությամբ նախատեսված կարգով պետք է վավերացվի ու վավերացման ենթակա է, առանց Սահմանադրական դատարան անցնելու՝ գնա վավերացման։ Չկա որևէ պայմանագիր»,- լրագրողների հետ զրույցում ասաց Սահմանադրական դատարանի նախագահ Արման Դիլանյանը։

Նա նշեց, որ եթե կա մի միջազգային պայմանագիր, որը  պետք է վավերացվի, բայց չի վավերացվել, ուրեմն Հայաստանի համար իրավական ուժ չունի։

Հիշեցնենք, որ այսօր Սահմանադրական դատարանը գրավոր ընթացակարգով քննում է Հայաստան-Ադրբեջան սահմանազատման հանձնաժողովների համատեղ աշխատանքի մասին կանոնակարգի սահմանադրականության հարցը:

Հարցին՝ ահազանգեր կան, որ այս կանոնակարգը հակասում է պետության շահին, ինչպե՞ս է վերաբերում այս  գնահատականներին, նա  ասաց. «Դե  բարձր դատարանը դրա համար էլ հավաքվել է, որպեսզի  որոշի՝ հակասում է, թե չի հակասում։ Դատարանն իր հեղինավոր խոսքը կասի՝ հակասում է, թե ոչ։

Եթե խնդիր տեսնենք, մի կասկածեք, խնդիրը կարձանագրվի, եթե խնդիր չտեսնենք, ասելու ենք՝ խնդիր չկա»։

Հարցին՝ ինչպե՞ս է վերաբերում ՍԴ անդամ Հրայր Թովմասյանի շուրջ  ծավալվող գործընթացներին, Ա.Դիլանյանն ասաց. «Ես որպես անձ ուշադիր հետևում եմ, բայց որևէ կերպ չեմ միջամտում քրեական գործի քննությանը։ Իսկ որպես դատարան, որպես դատարանի դատավոր, դատարանի նախագահ, երբ որ կգա մեր ասելիքի ժամանակը, մենք անպայման կասենք»։