Ձեր վստահելի աղբյուրը

«Անընդհատ հնչում է գույք, գույք, և մոռանում ենք, որ այս ամենը միայն գույք չէ, այս ամենը պատմություն է, այս ամենը արժեք է, այս ամենը Հայաստանի, մեր ժողովրդի արժեքն է»,- Հայաստանի նկարիչների միությունում Հայաստանի ստեղծագործական միությունների և այլ հասարակական կազմակերպությունների սեփականությունը հանդիսացող գույքերի նկատմամբ այդ կազմակերպությունների սեփականության իրավունքն անվավեր ճանաչելու և գույքերը պետականացնելու խնդրի վերաբերյալ ասուլիսում ասաց Հայաստանի նկարիչների միության նախագահ Սուրեն Սաֆարյանը։

Նա ընդգծեց, որ  Հայաստանի նկարիչների միությունն ամենակարևոր օղակներից մեկն է Հայաստանի մշակութային կյանքում․ «Եթե չլիներ Հայաստանի նկարիչների միությունը, Հայաստանի Ազգային պատկերասրահի շատ ու շատ սրահներ չէին համալրվի գոհարներով, եթե չլիներ Հայաստանի նկարիչների միությունը, այն բոլոր անվանի արվեստագետները չէի ունենա այն հնարավորությունը, որ ունեցել են դրսևորվելու, ցուցադրվելու, իրենց խոսքն ասելու, Հայաստանն արտերկրում ներկայացնելու»։

Նա նշեց, որ այս շենքը ստեղծվել է  նկարիչների համար, նկարիչների ջանքերով։

«Նկարիչների ներդրումն այս ամենի մեջ ակնհայտ է, ինչի մասին բոլորն են վկայում։ Այսօր կանգնած ենք մի խնդրի առջև, չեմ ուզում վարկաբեկել մյուս ՀԿ-ների, կազմակեպությունների գույքը, բայց կան արժեքներ, որոնք իրենց բնույթով տարբերվում են մնացած բոլոր գույքերից»,- ասաց Ս. Սաֆարյանը։

Նա նշեց, որ շատ վրդովված են, որովհետև ամիսներ շարունակ «շահագրգիռ կողմերով» քննարկում են, սակայն ստեղծագործական միությունները ներգրաված չեն այդ քննարկումներում։ 

«Մենք շահագրգիռ կողմ չե՞նք։ Այսինքն մենք չե՞նք կարող օգտակար լինել օրենքի մշակմանը, չէ՞ որ այս ամենը մեզ է վերաբերվում»,- հարցադրում է անում նա։ 

Ս. Սաֆարյանը տեղեկացրեց, որ ստեղծագործական միությունների նախագահների և այլ ՀԿ-ների անունից դիմում-նամակ են ուղարկել Նիկոլ Փաշինյանի՝ հանդիպելու ու քննարկելու ակնկալիքով։Միաժամանակ հույս հայտնեց, որ ապագայում նաև կհանդիպեն ԱԺ ներկայացուցիչների հետ։

«Հոկտեմբերի 30-ին Աբովյան 16-ում գտնվող Նկարիչների միության շենքի մասով դատարանը վճիռ պետք է կայացնի։ Եթե վճիռ կայացվեց՝ մենք էլ ի՞նչ օրենք կքննարկենք։
Աստված մի արասցե՝ վճիռ կայացվի, ըստ որի ստեղծագործական միությունների շենքերը պետականացվում են։ Այդ դեպքում մենք՝ միության նախագահներս, ի՞նչ օրենքի շուրջ ենք քննարկելու Ազգային ժողովում կամ այլ պատկան մարմիններում։ Եթե այս գույքն արդեն մերը չի լինելու, ի՞նչ օրենքի մասին են խոսելու»,- ասաց Նկարիչների միության նախագահը։

Նկարիչների միության անդամ Զարուհի Մուրադյանն ասաց, որ սա քաղաքական հարց է. «Բացառապես քաղաքական հարց է Հայաստանի մշակույթը,  ընդհանրապես Հայաստանը ոչնչացելու։ Պատահական չէ, որ զուգահեռաբար Ադրբեջանը մշակութային ջուրդ է անում Արցախում։ Զուգահեռաբար  Ալիևը Նիկոլի հետ անում են առայժմ մշակութային ցեղասպանություն մեր տարածքում։ Եկեք ամեն ինչ իրենց անուններով ասենք։

Առաջարկում եմ բոլոր միություններում հակընդդեմ հայց ներկայացնել կառավարության դեմ, անձամբ Սիսակ Գաբրիելյանի՝ չհաջողված լրագրողի,  մի հատ լակոտ, որ Քաջ Նազարի բախտով այսօր  դարձել է ԱԺ կրթության, գիտության, մշակույթի  հանձնաժողովի նախագահ։ Ոչ մի բանից գաղափար չունենալով՝ ինչ-որ մարդկանց ձեռքում գործիք է դարձել և հիմա սկզբից մի առաջարկ էր ուղարկել, մի քանի օր առաջ հանձնաժողովի նիստին լրիվ այլ առաջարկներ է ներկայացրել, որով ակնհայտ է, որ ամեն ինչ գնում է մեզ ունեցվածքից զրկելու ուղղությամբ։ 

Պետք է հասկանան... Չնայած նրանք ոչինչ չեն հասկանում, Հայաստանը մշակութազրկելու, հետո ընդհանրապես Հայաստանը ոչնչացնելու ծրագիր են անում»։

Հիշեցնենք, որ ավելի վաղ Գլխավոր դատախազությունը հանդես էր եկել «Հայաստանի գրողների միության» և Հայաստանի նկարիչների միության» շենքերը պետականացնելու նախաձեռնությամբ, քանի որ «ուսումնասիրության արդյունքում պարզվել է, որ սեփականության իրավունքի գրանցումը կատարվել է իրավական ակտերի պահանջների խախտմամբ»։