Ձեր վստահելի աղբյուրը

«Հրապարակ» թերթը գրում է.

«Մեկ շաբաթ առաջ իրավապահներն առգրավեցին Կապանի համայնքապետարանի սուբվենցիոն ծրագրերի գնումների փաստաթղթերը, կապարակնքեցին համայնքապետ Գևորգ Փարսյանի ընտանեկան «Նորոգշին» ընկերությունը: Սակայն գործի մասին որևէ մանրամասն չեն հայտնում։ Քննչական կոմիտեից երեկ ուղղորդեցին Հակակոռուպցիոն, այնտեղից ասացին, որ իրենց վարույթում նման գործ չկա։ Մինչդեռ Փարսյանն անձամբ է հաստատել, որ իրավապահներն իրեն են ներկայացրել քրեական վարույթ նախաձեռնելու մասին որոշումը և փաստաթղթեր են առգրավել համայնքապետարանից։

Մեր աղբյուրն ասում է, որ համայնքապետարանում անցած շաբաթվանից լարված մթնոլորտ է, բոլորը, շունչները պահած, սպասում են, թե ինչպես կդասավորվի Փարսյանի ճակատագիրը։ Համայնքապետն էլ է լարված՝ կա՛մ չի շփվում աշխատակազմի հետ, կա՛մ սուր է արձագանքում: Հայրը՝ Ռազմիկ Փարսյանը, հորդորել է որդուն՝ ազատման դիմում գրել, բայց որդին չի պատրաստվում հանձնվել։ Իսկապես, Փարսյանի հոր և նրա մտերիմների ընկերություններն են իրականացնում սուբվենցիոն ծրագրերը՝ մրցույթներում նրանք են շահել, սակայն գործող օրենսդրությունը որևէ արգելք չի սահմանում, որ համայնքապետի հոր ընկերությունը չի կարող մասնակցել գնումներին և չի կարող հաղթել։ Այս պարագայում պետք է կարողանան ապացուցել, որ հաղթանակն արհեստականորեն մատուցվել է «Նորոգշինին», և այդտեղ դեր է խաղացել համայնքապետի անձը»։

Մանրամասները թերթի այսօրվա համարում։