Ձեր վստահելի աղբյուրը

«Գրիգոր Ղազարյանից՝ ի հզորացում սերունդների. «Ինձ բացակա չդնեք․․․»». հենց այս ցուցանակն է այսուհետ տեսնելու Երևանի Ն․Աղբալյանի անվան թիվ 19 դպրոցի դասարաններից մեկը մտնող աշակերտները։

Արցախյան 44-օրյա պատերազմում զոհված Գրիգոր Ղազարյանի ծնողները միջոցներ են նվիրաբերել նորագույն կրթական տեխնիկա՝ սմարթ-էկրան Ն․Աղբալյանի անվան թիվ 19 դպրոցին նվիրելու համար, որտեղ ուսանել է Գրիգորը։ Ցուցանակը բացվեց «Սմարթ-էկրաններ զինվորից՝ ի հզորացում սերունդների» խորագրով միջոցառման ընթացքում, որին ներկա էին Գրիգորի ծնողները, ընտանիքի անդամները, դասընկերներն ու ուսուցիչները։

Գրիգորը 2019թ. հուլիսի 12-ին ծառայության է անցել Արցախի Հանրապետության «Եղնիկներ» զորամասում, ծառայել է հակաօդային պաշտպանության ուժերում։

Panorama.am-ի հետ զրույցում Գրիգորի մայրը՝ Ֆլորա Վերդյանը պատմեց, որ նախքան բանակ մեկնելը, տղան պետք է անցներ երկրորդ բուժզննում, քանի որ առողջության հետ կապված խնդիրներ է ունեցել. «Գրիգորը գնացել ու հրաժարվել էր երկրորդ բուժզննումից։ Նա ինձ ասաց՝ միևնույնն է, ինչքան էլ հակառակվես, պետք է գնամ ու ծառայեմ բանակում»։

Մայրը հիշեց, որ տղան շատ հաճախ էր գնում «Եռաբլուր» զինվորական պանթեոն, նույնիսկ շաբաթօրյակներ էր այնտեղ կազմակերպել, նաև մեջբերեց Գիգորի խոսքերը՝ «Բոլոր սիրո դրսևորումները, որոնց մենք կարող ենք հանդիպել մեր կյանքում, միայն հայրենիքն է, որ կարող է ներառել իր մեջ»։ 

«Հպատ եմ իմ որդու մարդ տեսակով։ Անձնուրաց ընկեր է եղել, շատ ջերմ էր իր ուսուցիչների նկատմամբ։

Միշտ ասում էի Գրիգորին՝ դպրոց եմ մտնում գլուխս կախ, հանկարծ ուսուցիչ չտեսնեմ։ Ինձ ասաց՝ մի օր դպրոցում կհպարտանան ինձանով։ Մտածեցի՝ գործարար կդառնա, մի բան կանի դպրոցի համար։

Իսկ ես այսօր իր մարդ տեսակով եմ հպարտ։

Ես խոսում եմ իմ որդու մասին, բայց աչքիս առաջ են Եռաբլուրի բոլոր տղաները, բոլորն էլ ուրիշ են եղել, պատահականությունների զոհ չեն դարձել, բոլորն էլ առաջ են մղվել ու դրա հետևանքով են զոհվել։ Անձնուրաց կռվել են։ Թող իզուր չարժեզրկեն մեր տղաների արածները»,- ասաց տիկին Ֆլորան։

Գրիգորը զոհվել է 2020 թ. սեպտեմբրի 28-ին ականի պայթյունից։

«Այս երեխաները պետք է ապրեն, արարեն նաև «Եռաբլուրում» հուղարկավորված  տղաների փոխարեն, պետք է հասնենք նրան, որ հաղթանակը մերը լինի. գրչով տված պատերազմը պետք է գրչով էլ հաղթենք»,- նշեց Գրիգորի մայրը։

Գրիգորի ընկեր, 44-օրյա պատերազմի մասնակից, Ն․Աղբալյանի անվան թիվ 19 դպրոցի պատմության ուսուցիչ Արման Գալստյանը  պատմեց, որ պատերազմի ժամանակ ինքն ու Գրիգորը տարբեր շրջաններում են եղել, իսկ Գրիգորի զոհվելու մասին լուրը իմացել է, երբ ինքը վիրավոր էր ու վերակենդանացման բաժանմունքում էր գտնվում։

«Մեծ ցավ ապրեցի, կորցրեցի հարազատ ընկեր, իրոք, հայրենասեր մարդ։ Երբ դասերին օրինակ եմ բերում, թե ինչ է հայրենասիրությունը, ովքեր են հայրենասերները, ինչպես է ձևավորվում հայրենասիրությունը, Գրիգորի մասին անհնար է չխոսել»,- ասաց Ա. Գալստյանը։

2020թ. սեպտեմբերի 28. Գրիգորնն ընդամենը 19 տարեկան էր...

Հետմահու պարգևատրվել է «Մարտական խաչ» և «Արիության համար» մեդալներով։

Նշենք, որ «Վիզուալ Հայաստան» զարգացման հիմնադրամը «Աշխարհացույց» կրթական ծրագրի շրջանակներում սմարթ-էկրաններ է նվիրաբերում դպրոցներին։ Դպրոցները սմարթ-էկրանները պետք է վաստակեն սեփական աշխատանքով՝ մասնակցելով մրցույթի։ Սակայն, ինչպես նշեցինք,  Երևանի Ն․Աղբալյանի անվան թիվ 19 դպրոցը սմարթ-էկրան ստացավ Արցախյան երրորդ պատերազմում զոհված Գրիգոր Ղազարյանի ծնողների միջոցների նվիրաբերության շնորհիվ։

Մանրամասն՝ տեսանյութում։