Ձեր վստահելի աղբյուրը

«Ինչ ենք անելու այսօր։ Կիրակի է, բոլոր պետական հաստատությունները չեն գործում, փակ են։ Բայց այստեղից գնալու ենք Սահմանադրական դատարան»,- Հանրապետության հրապարակում հանրահավաքի ժամանակ ասաց Բագրատ արքեպիսկոպոս Գալստանյանը։

Սրբազանը շարունակեց. «Չարիքները վերագրումներ են արել՝ շենքներ ենք գրավելու և այլն։ Այդ շենքերը մերն են, գրավելու կարիք չունենք։ Բայց միասին մի գործողություն պետք է կատարենք։ Վստահ եմ՝ ոմանք, շատերդ այս հայտարարությունից հետո ասելու եք՝ ի՞նչ իմաստ ունի։ Իմաստ ունի ժողովուրդ, քայլերի հաջորդականությամբ ծրագրված ընթացք է։

Առաջինը գնացինք  Հանրային հեռուստաընկերություն, մեր խնդիրը կատարեցինք, ստի որջից հնչեց ճշմարտության ձայնը։

Հիմա գնալու ենք Սահմանադրական դատարան։ Ինչու։ Մի կարծեք՝ չենք խորհել, չենք մտածել, որ շենքի դիմաց ինչ ենք անելու։ Կարիքը կա՝ թե իրազեկման, թե ուղղակիորեն հանրայնացնելու ամոթի և անարգանքի սյունին գամելու բոլոր այն դատավորներին, որոնք այս վերջին որոշումն են ընդունել, որոնք կոչված էին պետականությունն ու Սահմանադրությունը  պաշտպանելու և ոչ հակառակը, միևնույն ժամանակ հնարավորություն տալու նրանց ազատագրվելու ծառայամտական հոգեբանությունից»։

Սահմանադրական դատարանի նախկին և ներկա բոլոր դատավորներին Բագրատ Սրբազանը հրավիրում է Սահմանադրական դատարանի առջև։

«Չեք գա, մենք կգանք»,- ասաց Սրբազանը։ 

Նա հայտարարեց, որ Սահմանադրական դատարանի առջև կհայտարարեմ, թե ինչ ենք անելու մի երկու օրից. «Նախատեսված է չորեքշաբթի, կեսօրին։ Վայրը կասեմ՝ որտեղ։ Չափազանց կարևոր միջոցառում ունենք իրականացնելու»։

Հանրապետության Հրապարակում ավարտվեց Սրբազան Պայքարի հանրահավաքը։ Ցուցարարները Բագրատ արքեպիսկոպոս Գալստանյանի առաջնորդությամբ այժմ շարժվում են դեպի Սահմանադրական դատարան։