Ձեր վստահելի աղբյուրը

ՓՄՁՀԱ խորհրդի նախագահ Հակոբ Ավագյանը գրում է․

«Սիրիահայ գործարարների հետ, մասնավորապես Գերփոքր բիզնեսի ներկայացուցիչների, ովքեր 2012-13թթ-ին պատերազմի պատճառով տեղահանվեցին և եկան Հայաստան, այն ժամանակվա գործող ՓՄՁ ԶԱԿ-ի աջակցության ծրագրերի շրջանակներում շատ ակտիվ աշխատեցինք։

Դրանից հետո փորձեցինք իրենց՝ սիրիահայ փոքր բիզնեսի ներկայացուցիչներին, միավորել ՓՄՁ Ասոցիացիայում, որպեսզի իրենց խնդիրներով մշտական զբաղվեն այնպես ինչպես տեղական ՓՄՁ ների համար։ Չնշեմ օրինակներ, թե ինչ հարցերով կարողացավ Ասոցիացիան աջակցել վերջիններիս։
Ի սկզբանե դեմ էինք, առանձնացված սիրիահայ գործարար և միավորում սկզբունքին։ Ասոցիացիային անդամագրվեցին մոտ 70 սիրիահայ գործարար, նրանց կազմից ներկայացուցիչ բերեցինք կառավարման խորհուրդ՝ որպեսզի այդ օրերին իրենց արդիական խնդիրներն ավելի շատ գան օրակարգ։
Բայց մենք չունեինք ֆինանսական ռեսուրսներ։

Այդ օրերին տեղահանվածներին աջակցություն ցուցաբերող GIZ -ի թիմը եկավ ու ասեց, որ մենք կաջակցենք սիրիահայ գործարարներին, եթե նրանք ձեզնից առանձնանան և ստեղծեն առանձին սիրիահայ գործարարների միություն ...(

Մեր համոզումները որ սա սխալ ճանապարհ է վաղը կարող է լինել արցախահայ, ուկրաինահայ ... և այլ ՓՄՁ, եկեք չտարանջատեք և այլն , ոչ մի օգուտ չտվեց։

Պետությունը (ի տարբերություն հիմա, որ արցախահայ գերփոքր բիզնեսներին ոչ մի աջակցության ծրագիր չկա), այդ ժամանակահատվածում համաձայնեց, շենք տրամադրեց որպեսզի սիրիահայ ՓՄՁ ներն ունենան իրենց արտադրական տարածքները և այլն։ GIZ ն էլ աջակցեց որ նոր ստեղծվող միությունն ու այդ տարածքը տեղից շարժվի։

Այս օրերին ցավով տեսնում եմ՝ հարկադրաբար փակվում են հրապարակի մետրոյի հարևանությամբ տեղակայված սիրիահայ գերփոքր բիզնեսները, որքանով տեղյակ եմ արդեն մոտ 1 տարուց ավելի փակվել է վերոհիշյալ աջակցության ծրագրով սիրիահայերի համար ստեղծված  կենտրոնը։
Ցավոք չեմ տեսնում այն ժամանակ ստեղծված սիրիահայ գործարարների միության որևէ գործողություն, արձագանք։

Հարկադրաբար փակվելու պատճառների շատ մանրամասներից տեղյակ չեմ, միայն մամուլից եմ տեղեկացել։

Բայց ամեն դեպքում, առաջարկում եմ շահագրգիռ մարդկանց, գերատեսչությունների ներկայացուցիչներին, հավաքվել հասկանանք ինչով կարող ենք օգնել։

Իհարկե շատ լավ կլինի (և մանդատով պարտավոր է) որ հենց Էկոնոմիկայի նախարարությունը ստանձնի մոդերատորի դերը (եթե իհարկե մինչև հիմա ինչ որ բան արել են՝ կեցցեք, կխնդրեմ արձագանքել)»։