Ձեր վստահելի աղբյուրը

«Ակցիայի հիմնական նպատակը Բաքվում կայանալիք COP29-ին ընդառաջ, նաև Հայաստանում համապատասխան գերատեսչությունների, կառույցների առաջ Ադրբեջանում ապօրինաբար պահվող հայ ռազմագերիների և պատանդների, անհետ կործաների ճակատագիրը պարզելու, անհապաղ ազատ արձակման հարցը բարձրաձայնելն է»,- ՄԱԿ-ի երևանյան գրասենյակի դիմաց ակցիայի ժամանակ լրագրողների հետ զրույցում ասաց Արցախի Հանրապետության Մարդու իրավունքների պաշտպան Գեղամ Ստեփանյանը։

Նա նշեց, որքան մոտենում է COP29- համաժողովի օրը, այնքան միջազգային դաշտում որոշակի ակտիվություն է նկատվում այս հարցով։

«Երեկ էլ տեղեկացանք, որ Եվրոպական խորհրդարանում է պլանավորվում այս թեմաներով քննարկում իրականացնել։ Սա ժամանակահատված է, երբ աշխարհի  ուշադրությունը դեպի Ադրբեջան է։ Մենք պետք է օգտագործենք  բոլոր հնարավորությունները՝ Ադրբեջանի  վրա սևեռված ժամանահատվածում  պարտադրելու Բաքվին կատարելու մարդու  իրավունքների միջազգային իրավունքի, մարդասիրական իրավունքի դրույթները, հակառակ պարագայում չխոսելով, չբարձրաձայնելով, հարցը առաջ չմղելով՝ Ադրբեջանն ավելի կոգևորվի  հետագա անպատժելիությունից»,- ասաց Գ. Ստեփանյանը։

Հարցին՝ ինչո՞ւ Նիկոլ Փաշինանը ՄԱԿ-ի ամբիոնից չխոսեց հայ գերիների, պատանդների մասին, Գեղամ Ստեփանյանն ասաց. «Թե ինչու չխոսեց, պետք է հարցնել Նիկոլ Փաշինյանին։ Բայց ՄԱԿ-ի  գլխավոր ասամբլեայի նստաշրջանը  կարևորագույն առիթ էր այս՝ բացառապես հումանիտար բնույթի հարցը բարձրաձայնելու, ևս մեկ անգամ միջազգային ամենաբարձր ատյանից միջազգային հանրության ուշադրությունը հրավիրելու համար»։

Արցախի ՄԻՊ-ի խոսքով, Հայաստանը պետք է առավել ակտիվ քայլեր ձեռնարկի միջազգային հարթակներում, հատկապես նոյեմբերին ընդառաջ, հումանիտար այս հարցն ավելի բարձր հնչեցելու համար՝ կիրառելով դիվանագիտության բոլոր գործիքները։

«Պետք է լինի պետական մակարդակով իրականացվող քաղաքականություն։ Որքան էլ տարբեր խմբեր, գերիների ու անհետ կորածների ծնողները, սրտացավ քաղաքացիներն ակցիաներ անեն, միջազգային  մակարդակում հարցը բարձրացնողը պետք է լինի Հայաստանը։

Եթե տեսնում ենք, որ Հայաստանի իշխանություններն  ակտիվ, համապատասխան քայլեր չեն ձեռնարկում, մենք ի՞նչ գործիքակազմ ունենք կիրառելու։ Պետք է հանրային ճնշման արդյունքում հարցը բերել օրակարգ, անել այնպես, որ Հայաստանի իշխանությունը, ի թիվս այլ պետությունների, հարցը օրակարգում պահի։  Իսկ միջազգային հանրությունից, մասանվորապես ՄԱԿ, ԱՄՆ, Ռուսատան, Ֆրանսիա, որոնց դեսպանատներին այսօր մենք նամակներ ենք հանձնելու, մեր պահանջն է՝ COP29-ին ընդառաջ հանդես գալ հրապարակային ու տեսանելի պահանջով ուղղված Ադրբեջանին՝ անհապաղ և առանց որևէ նախապայմանների ազատ արձակել Բաքվում ապօրինի պահվող գերիներին ու պատանդներին։

Դեսպանատներին ուղղված նամակներում  նաև կան Արցախի ժողովրդին հուզող այլ հարցեր,  մասնավորապես վերադարձի իրավունքը միջազգային բանակցային գործընթաց վերադարձնելու, Արցախում հայկական պատմամշակութային ժառանգության պահպանության ուղղությամբ հստակ գործնական քայլեր ձեռնարկելու պահանջներ»,- ասաց նա։

Գեղամ Ստեփանյանը նշեց, որ Հայաստանի ԱԳՆ-ի հետ որևէ կապ չունի, դրա համար պահանջագիրը ներկայացվելու է հրապարակայնորեն։

«Հայաստանի Մարդու իրավունքների պաշտպանի  հետո որոշակի  համագորակցություն կա զուտ Հայաստանում արցախցիների իրավունքների  պաշտպանության առումով»,- ասաց ԱՀ Մարդու իրավունքների պաշտպանը։