Ձեր վստահելի աղբյուրը

«Ժողովուրդ» թերթը գրում է.

«ՀՀ ՊԵԿ նախագահ Ռուստամ Բադասյանը հայտարարել էր՝ «Հայաստանում շոու բիզնեսի ներկայացուցիչներն սկսել են ավելի պարտաճանաչ հայտարարագրել իրենց եկամուտները և վճարել հարկերը»։ ՀՀ վարչապետ Նիկոլ Փաշինյանը 2024 թվականի փետրվարին հակառակի մասին խոսեց՝ թիրախավորելով հայտնիներին, թե շոու բիզնեսի ներկայացուցիչները պետք է հարկ վճարեն, այլապես օրենքով սահմանված պատասխանատվության կենթարկվեն:

Փաշինյանի խոսքով՝ օդանավակայան տանող ճանապարհից չպիտի օգտվեն արտագնա աշխատանքի գնացող և արտերկրում համերգներով հանդես եկող շոու բիզնեսի ներկայացուցիչները, քանի որ այդ ճանապարհը կառուցվել է հարկ վճարողների շնորհիվ: Ըստ Փաշինյանի՝ օդանավակայան գնացողները ինչո՞ւ պիտի մեր հարկերի շնորհիվ կառուցված ճանապարհով երթևեկեն. «Մենք չենք ցանկանում, որ իրանք մեր հաշվին ստեղծված ճանապարհով երթևեկեն։ Թող մեր սիրելի հայրենակիցներն իրենց համար ճանապարհ սարքեն ու այդ ճանապարհով երթևեկեն, որովհետև, մաշվում ա, չէ,՞ էդ ճանապարհը: Մենք դա երկար ժամանակ չենք հասկացել: Մեզ թվում էր, թե մենակ կոշիկն ա մաշվում. ճանապարհն էլ ա մաշվում…. Շոու բիզնեսի ներկայացուցիչներին օդանավակայանից պիտի ասենք՝ էս ճանապարհները ձեզ համար չեն, Զանգվի ձորով, բնաշխարհը վայելելով, ոտ-ոտ եկեք, հասեք Երևան»,- իր խոսքում նշել էր Փաշինյանը:

«Ժողովուրդ» օրաթերթը հարցումով դիմել է ՀՀ պետական եկամուտների կոմիտե. խնդրել էինք, համաձայն մեր տրամադրած ՀՎՀՀ-ների, համապատասխան կերպով տրամադրել անհատ ձեռնարկատերերի տարեկան հարկային շրջանառությունը 2019 թվականից մինչև 2023 թվականը։

Աղյուսակում կտեսնեք շոու բիզնեսի 15 ներկայացուցչի հարկային շրջանառությունը։ Օրինակ՝

1. Միհրան Ծառուկյանը 2019-ին վճարել է 932 հազար դրամ հարկ, 2020-ին՝ 1 մլն 18 հազար, 2021-ին՝ 70 հազար, իսկ 2022-ին և 2023-ին առկա հարկային մուտքեր չկան։
2. Ալբերտ Սիմոնյանը՝ նույն ինքը Թաթա Սիմոնյանը, 2019-ին վճարել է 2 մլն 445 հազար դրամ հարկ, հաջորդող տարիները ակտիվություն չի ցուցաբերել։
3. Արկադի Դումիկյանը և Իվետա Մուկուչյանը հարկային ակտիվություն չեն ցուցաբերել։
4. Արփինե (Արփի) Գաբրիելյանը 2020-ին 29 հազար դրամ հարկ է վճարել, իսկ 2021-ին՝ 30 հազար դրամ։
5. Ռաֆիկ (Ռաֆայել) Երանոսյանը 2019 թվականին վճարել է 235 հազար 960 դրամ հարկ, 2020-ին՝ 753 հազար 886 դրամ, 2021-ին՝ 1 մլն 208 հազար դրամ, 2022-ին՝ 1 մլն 346 հազար դրամ, 2023-ին՝ 2 մլն 145 հազար դրամ։
6. Ռազմիկ Ամյանը 2019-ին վճարել է 499 հազար դրամ հարկ, 2020-ին՝ 990 հազար դրամ, 2021-ին՝ 12 հազար դրամ, 2022-ին՝ 18 հազար դրամ, 2023-ին՝ 0 դրամ։
7. Սարո Թովմասյանը 2019-ին վճարել է 216 հազար 848 դրամ հարկ, 2020-ին՝ 407 հազար դրամ, հաջորդող տարիներին, 2021 և 2022 թվականներին 0 դրամ է վճարել, իսկ 2023-ին՝ 1 մլն 563 հազար դրամ։
8. Արման Հովհաննիսյանը հարկեր վճարել է միայն 2019 թվականին՝ 289 հազար դրամ։
9. Հայկարամ Ղևոնդյանը՝ Սպիտակցի Հայկոն, հարկ վճարել է միայն 2021 թվականին՝ 11 հազար 500 դրամ։
10. Սոնա Շահգելդյանը վճարել է միայն 2023 թվականին՝ 24 հազար դրամ։
11. Լուիզա Ղամբարյանը 0 դրամ է վճարել նշված ժամանակահատվածում։
12. Մարտին Մկրտչյանը հարկ վճարել է 2019 և 2020 թվականներին՝ համապատասխանաբար 184 հազար դրամ և 194 հազար դրամ։
13. Ելիզավետա Ներսիսյանը՝ Լուիզա Ներսիսյանը, 2019 և 2020 թվականներին հարկ չի վճարել, սակայն 2021-ին վճարել է 449 հազար դրամ հարկ: 2022 թվականին Ներսիսյանը կրկին հարկ չի վճարել, իսկ 2023-ին վճարել է 18 հազար դրամ։
14. Արտաշ Ասատրյանը Հայաստանում հարկ չի վճարել։

Հարկ է նշել, որ նշված ԱՁ-ները, որոնք հարկային շրջանառություն որևէ տարում ցույց չեն տվել, հարկ վճարել են այլ եղանակով։ ՊԵԿ-ից մեզ փոխանցեցին նաև, որ ֆիզիկական անձանց եկամուտները, օրենքով սահմանված դեպքերում, կարող են հարկվել և հայտարարագրվել հարկային գործակալ հանդիսացող այլ հարկ վճարողների կողմից։ Այսինքն՝ հաճախ նաև, շոու բիզնեսի ներկայացուցիչները հարկերը վճարում են ոչ թե իրենց ԱՁ-ներով, այլ իրենց «փրոդաքշընների» միջոցով։ Այսինքն՝ նշված զրոները ոչ թե հարկեր չվճարելու մասին են, այլ ԱՁ-ով չվճարելու մասին։

Կարճ ասած՝ Նիկոլ Փաշինյանն էլի չի կարողացել ճշմարտությունն իմանալ կամ հայտնել»։

Մանրամասները թերթի այսօրվա համարում։