Ձեր վստահելի աղբյուրը

«Պորո՛ն Ավինյան, ես ակնկալում էի, որ դուք պետք է սաստեիք Լևոնին Հովհաննիսյան, ինձ հետ «ընկերով» խոսելու համար»,- ավագանու նիստում Երևանի քաղաքապետին դիմեց «Մայր Հայաստան» խմբակցության անդամ Մեսրոպ Մանուկյանը՝ դիմելով փոխքաղաքապետ Լևոն Հովհաննիսյանին։

Ավագանու անդամը շարունակեց ելույթը՝ ասելով. «Պարոն Հովհաննիսյան, եթե քուչի բազար եք տանում, որ «ընկերով» եք խոսում, էդ դպրոցում առաջին դասարանից վերև չեք բարձրացել իմ հետ համեմատած։ Չփորձեք մյուս անգամ «պարոն Մանուկյանից» բացի ուրիշ ձև խոսել, չեք կարող»։

Նա ասաց, թե երբ գովաբանում է քաղաքապետարանին՝ Հովհաննիսյանը ժպտում է, բայց երբ քննադատում է՝ ծանր է տանում։

«Չտեսա մի օր, որ Արմեն Փամբուխչյանին քննադատեի, էդ մարդը նեղվեր»,-հայտարարեց Մանուկյանը։

Նա ասաց, թե ցանկանում է Երևանի պատվավոր քաղաքացիների հետ հանդիպում կազմակերպել, որպեսզի նրանք իրենց ձայնը բարձրացնեն մայրաքաղաքի խնդիրների վերաբերյալ, օրինակ՝ ուղեվարձի թանկացման։ Խմբակցության ղեկավարը ելույթ ունեցավ երգիչ Բարսեղ Թումանյանին Երևանի պատվավոր քաղաքացի կոչում տալու հարցի քննարկման ժամանակ։

Մանուկյանը դիմեց քաղաքապետի խորհրդական Կամո Արեյանին՝ որպես պատվավոր քաղաքացի իր կարծիքն հայտնելու։

«Մեսրոպ ջան, ես պատվավոր չեմ ես հավերժական քաղաքացի եմ, ես պատվավորի կոչում չունեմ, ախպոր տղա»,-արձագանքեց Արեյանը։

Արձագանքեցին նաև ավագանու ՔՊ խմբակցության անդամները։

«Ես խնդրում եմ միս ու եղունգի արանք չմտնեք, ես ու պարոն Արեյանն իրար լավ ենք հասկանում»,-արձագանքեց Մեսրոպ Մանուկյանը։

Ավագանին Երևանի պատվավոր քաղաքացու կոչում շնորհեց նաև ճարտարապետ Լևոն Թոքմաջյանին։