«Ժողովուրդ». Մհեր Սեդրակյանի որդուն պատկանող ընկերությունից միլիարդավոր դրամների պետական գնումներ են արվել
«Ժողովուրդ» թերթը գրում է.
«Միլիարդավոր դրամների պետական գնումներ են արվել ԱԺ նախկին պատգամավոր Մհեր Սեդրակյանի որդուն՝ Ազգային Ժողովի «Հայաստան» խմբակցության նախկին պատգամավոր Դավիթ Սեդրակյանին պատկանող «Բիդեք» ՍՊԸ-ից։
2024 թվականի հունվարի 1-ից մինչև հոկտեմբերի 14-ը «Բիդեք» ՍՊԸ-ի և մի քանի գերատեսչությունների միջև 7 պայմանագիր է կնքվել, այդ թվում՝ ՀՀ կրթության, գիտության, մշակույթի և սպորտի նախարարության, «Հայկական ատոմային էլեկտրակայան» ՓԲԸ-ի, ՀՀ քաղաքաշինության կոմիտեի, ՀՀ տարածքային կառավարման և ենթակառուցվածքների նախարարության, Հայաստանի տարածքային զարգացման հիմնադրամի հետ։
«Ժողովուրդ» օրաթերթը պաշտոնական աղբյուրներից պարզեց, որ պայմանագրերի ընդհանուր արժեքը կազմել է գրեթե 4 միլիարդ դրամ և ավելի։ Հենց այս ընկերությունն է, որ ստանձնել է Հայոց ցեղասպանության հուշահամալիրի և թանգարանի հիմնանորոգման և բարեկարգման աշխատանքների կատարումը։ Այս ծառայությունը մատուցելու համար Դավիթ Սեդրակյանի ընկերությանը տրամադրվել է 743 մլն ՀՀ դրամ։
Մանրամասնենք, որ Սեդրակյանի «Բիդեք» ՍՊԸ-ի և «Հայկական ատոմային էլեկտրակայան» ՓԲԸ-ի միջև կնքված պայմանագիրն արժեցել է 844 մլն 937 հազար դրամ, նպատակը՝ ««ՀԱԷԿ» ՓԲԸ կարիքների համար պահեստային ճգնաժամային կենտրոնի կառուցման աշխատանքներ»։
«Բիդեք» ՍՊԸ-ի և ՀՀ կրթության, գիտության, մշակույթի և սպորտի նախարարության միջև կնքված պայմանագրի արժեքը կազմել է 431 մլն 980 հազար դրամ, նպատակը՝ «կրթական օբյեկտների հիմնանորոգում (Երևանի թիվ 8 արհեստագործական պետական ուսումնարանի հիմնանորոգման 2024 թ. աշխատանքներ)»։
«Բիդեք» ՍՊԸ-ի և ՀՀ քաղաքաշինության կոմիտեի միջև կնքված պայմանագրի արժեքը կազմել է 9 մլրդ 410 մլն դրամ, նպատակը՝ «ՀՀ Լոռու մարզի Ստեփանավան համայնքի Աշոտաբերդ թաղամասի կառուցապատման աշխատանքի» մատուցում։
«Բիդեք» ՍՊԸ-ի և ՀՀ տարածքային կառավարման և ենթակառուցվածքների նախարարության միջև կնքված պայմանագիրն արժեցել է 438 մլն 822 հազար դրամ, նպատակը՝ «կամուրջի հիմնանորոգման աշխատանքների» մատուցում։
«Բիդեք» ՍՊԸ-ի և Հայաստանի տարածքային զարգացման հիմնադրամի միջև կնքված պայմանագիրն արժեցել է 2 մլրդ 964 մլն դրամ, նպատակը՝ «ՀՀ Արագածոտնի մարզի ք. Աշտարակի Վ. Պետրոսյանի անվ. հիմն. դպրոցի կառուցման աշխատանքների» մատուցում։
«Բիդեք» ՍՊԸ-ի և Հայաստանի տարածքային զարգացման հիմնադրամի միջև կնքված մյուս պայմանագրի արժեքը կազմել է 1 մլրդ 91 մլն դրամ, նպատակը՝ «ՀՀ Արարատի մարզի Լուսաշող բնակավայրի կրթահամալիրի կառուցման» աշխատանքների» մատուցում։
Պայմանագրերը կնքվել են հրատապ բաց մրցույթով կամ բաց մրցույթի ընթացակարգով՝ այսինքն՝ առանց մրցակցության»։
Մանրամասները թերթի այսօրվա համարում։
Լրահոս
Տեսանյութեր
Արցախի ղեկավարությունը Բաքվում է, որովհետև նրանք առաջնորդել են մեր քաղաքական պայքարը. Բեգլարյան
