Ձեր վստահելի աղբյուրը

«Անդրանիկ Քոչարյանը մտահոգիչ հայտարարություն արեց, ասաց՝ «գործ տվողների» մասին այդ օրենքը։ Շատ խնդրահարույց է, որ պաշտպանության հանձնաժողովի նախագահը նման արտահայտություն է անում»,- ԱԺ-ում լսումների ժամանակ ասաց ՔՊ-ական պատգամավոր Հայկ Սարգսյանը՝ նկատի ունենալով ԱԺ պաշտպանության և  անվտանգության հարցերի մշտական հանձնաժողովի նախագահ, ՔՊ-ական պատգամավոր Անդրանիկ Քոչարյանին:

Անդրանիկ Քոչարյանն արձագանքեց. «Ես կատակով ասացի Հայկ, այդպես տարածված էր  Վրաստանում»։

Հայկ Սարգսյանն ասաց. «Անգամ չի կարելի դրա մասին կատակ անել։ Ինչո՞ւ»։

«Ընդունեցի»,- ասաց Քոչարյանը։

«Եթե դեպք է եղել մասնավոր տարածքում, հաճախ խնդիրներ ենք ունենում։ Երբ իրավապահ մարմինները գնում են  տվյալ տարածքը նկարահանող տեսանյութը  վերցնելու, տվյալ քաղաքացին  խուսափում է  տալուց, որպեսզի բակում չպիտակավորվի, քրեական ենթամշակույթ կրող անձինք, շրջապատի մարդիկ չպիտակավորեն, թե ինչու է համագործակցել  ոստիկանության հետ, ինչու է օգնել, որպեսզի հանցագործությունը բացահայտվի»,- ասաց Հայկ Սարգսյանը։ 

Նա դիմեց ՆԳ նախարար Վահե Ղազարյանին՝ հետաքրքրվելով, թե ի՞նչ աշխատանք է տարվում, որպեսզի հանրության շրջանում այս  կարծրատիպերը կոտրվեն, որպեսզի հաղորդում ներկայացնողը, ոստիկանության հետ համագործակցողը լինի ոչ թե «գործ տվող», այլ իր երկիրը սիրող քաղաքացի։