Ձեր վստահելի աղբյուրը

«Մեր ուսումնասիրություններով 2024 թվականին ԶՈւ-երում արձանագրվել է 39 զինծառայողի մահվան դեպք, որից 4-ն է միայն եղել հրադադարի ռեժիմի խախտման հետևանքով»,- «Մեդիակենտրոն»-ի մամուլի սրահում անցկացված «Խաղաղ պայմաններում զինվորների մահվան դեպքերի աճ․ ո՞վ է պատասխանատու» խորագրով քննարկմանը հայտնեց Հելսինկյան քաղաքացիական նախաձեռնության Վանաձորի գրասենյակի իրավապաշտպան Նազելի Մովսիսյանը։

Հիշեցնենք, որ Ազգային ժողովի վերջին լսումների ժամանակ ՀՀ գլխավոր դատախազը հայտնեց, որ բանակում զոհերը 26-ն են եղել, որից 5-ը ինքնասպանություն։

Նազելի Մովսիսյանի խոսքով, ոչ մարտական պայմաններում մահվան դեքերը նախորդ տարիների հետ համեմատած շատ մեծ է։

Նա հիշեցրեց, որ նախորդ տարի արձանագրվել էր ոչ մարտական պայմաններում 64 մահվան դեպք և 19 դեպք՝ հրադադարի ռեժիմի հետևանքով։

«Համեմատելով վերջին 10-12 տարվա դինամիկան՝ արձանագրում ենք, որ ԶՈւ-երում ոչ մարտական պայմաններում մահացության դեպքերը միջինում կազմում են ավելի քան 80%։

Իրավապաշտպանը նշեց, որ պաշտոնական և իրենց հրապարակած վիճակագրության տարբերության պատճառն այն է, որ 2017 թվականից հետո զինծառայողների մահվան զինվորական ծառայությունների հետ կապված և չկապված դեպքեր տարանջատվել են։

«Խաղաղության երկխոսություն» ՀԿ նախագահ և իրավապաշտպան Զառա Հովհաննիսյանն էլ նշեց.« Ինքնասպանությունների մասով մենք մեր պրակտիկայում ունեցել ենք այնպիսի դեպքեր, երբ կյանքի հետ անհամատեղելի բազմաթիվ հրազենային վիրավորումներ ունեցողի դեպքը, այդ թվում՝ կրծքավանդակին  և գլխին ունեցած,  որակել են ինքնասպանություն։ Թե ինչպես է մարդը կրակել իր գլխին, հետո կրծքավանդակին՝ անհասկանալի է, նույնիսկ փորձագետները չեն կարողանում հասկանալ, բայց միևնույնն է՝ որակվում է որպես ինքնասպանություն»։