Ձեր վստահելի աղբյուրը

«1/100.000 չափերով քարտեզի վրա մատիտի գիծը գետնի վրա ունի 100 մետր լայնություն։ Օպտիմիզացիայի իմաստը կայանում է նրանում, որ եթե դուք այսօր լիազորեք՝  հնարավոր է կիրառել, եթե ոչ՝ հնարավոր չէ, որովհետև երբ մենք Տավուշի մարզում սահմանի գիծը վերականգնել ենք, 100 մետրի շրջանակում որևէ օպտիմիզացիա տեղի չի ունեցել, գիծն անցել է 100 մետրի մեջտեղով՝ 50 մ այս կողմից և 50 մ այն կողմից»,- ԱԺ Արտաքին հարաբերությունների մշտական հանձնաժողովի արտահերթ նիստում Հայաստանի և Ադրբեջանի միջև պետական սահմանի սահմանազատման և սահմանագծման հարցի քննարկման ժամանակ ասաց փոխվարչապետ Մհեր Գրիգորյանը։

Նա տեղեկացրեց, որ Կիրանցում բնակչության շահերը պաշտպանելու համար օպտիմիզացիայի ինստիտուտը պետք էր կիրառել՝ փոխադարձ համաձայնությամբ, որը պետք է ամրագրվի միջպետական համաձայնագրով։

«Այս իմաստով կանոնակարգը միակ փաստաթուղթը չէ, կամ բնավ այն իրավական հիմքը չէ, որի հիման վրա սահմանը վերականգնվելու է»,-հայտարարեց Գրիգորյանը։

Մինչ այդ  «Հայաստան» խմբակցության պատգամավոր Արմեն Ռուստամյանը արձանագրեց, որ համաձայն կանոնակարգի ՀՀ և ԱՀ միջև ծագած հնարավոր վեճերի լուծման տեքստը պետք է լինի ռուսերեն տարբերակի մեջ, սակայն պատգամավորներին բաժանված է միայն հայերեն տարբերակը։

«Կան ֆունդամենտալ հարցեր, որոնց շուրջ պետք է լինի կոնսենսուս։ Մինչև այդ կոնսենսուը չլինի, դետալների շուրջ քննարկումներն անիմաստ են»,- ասաց Ռոստամյանը և հարցրեց, թե ինչու է Հայաստանը շտապում վավերացնել աշխատակարգը, քանի որ հնարավոր է Ադրբեջանը վերջին հաշվով չվավերացնի այն։

Մհեր Գրիգորյանը հայտնեց, թե չունի մտավախություն, որ ադրբեջանական կողմը կձգձգի և չի վավերացնի այն, քանի որ պատճառները չի տեսնում, բայց այդ դեպքում էլ վերջին հաշվով կանոնակարգը ուժի մեջ կմտնի, երբ երկրենրը փոխանակվեն ծանուցումների բնօրինակներով:

«Եթե վավերացման գործընթացը չավարտվի, երկրներից մեկի կողմից վերապահումներ սահմանվեն դրա հետ կապված, ապա ծանուցումների փոխանակում տեղի չի ունենա և պրոցեսը կընդհատվի»,- ասաց Գրիգորյանը։