Ձեր վստահելի աղբյուրը

«Հենց նոր դուք հերթական անգամ կեղծեցիք և ստեցիք՝ մեղադրելով Դաշնակցությանը Արցախը Ադրբեջանի տարածք ճանաչելու մեջ և այն էլ ոչ ավել, ոչ պակաս «Վարչատարածքային բաժանման մասին» օրենքի վրա հղում կատարելով»,- ԱԺ-ում Ալեն Սիմոնյանին դիմեց «Հայաստան» խմբակցության քարտուղար Արծվիկ Մինասյանը՝ Արձագանքելով ԱԺ նախագահի այն մեղադրանքին, թե ՀՅԴ-ն Արցախը ճանաչել է Ադրբեջանի կազմում՝ կողմ քվեարկելով «Վարչատարածքային բաժանման մասին» օրենքին։

 
Ելույթը հնչեց այն ժամանակ, երբ ԱԺ-ն քննարկում էր «Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովի ու Ադրբեջանի Հանրապետության և Հայաստանի Հանրապետության միջև պետական սահմանի սահմանազատման պետական հանձնաժողովի համատեղ գործունեության մասին» կանոնակարգը վավերացնելու մասին» նախագծի՝ օրակարգ ընդգրկելու հարցի քննարկման ժամանակ։

Մինասյանը Սիմոնյանին առաջարկեց թողնել նման վարքագիծը և ԱԺ ամբիոնից չասել այնպիսի բաներ, որոնք իրականության հետ կապ չունեն։

«Հանձնաժողովը օրակարգ մտցվող նախագծի վերաբերյալ պետք է եզրակացությունը ներկայացներ մինչև ժամը12-ը և բոլորն են դրա մասին տեղյակ։Նշեք թե, այսօր ինչ հիմքով եք այն բերել»,-նախագծի մաիսն հարցրեց Մինասյանը։

«Ինչ վերաբերում է ստելուն, ապա ստում եք դուք, որովհետև ձեր հետևում նստած Դաշնակցությունը ներկայացնող պատգամավորն առնվազը քվեարկել է «Վարչատարածքային բաժանման մասին» օրենքի կողմ, որտեղ ՀՀ սահմանից այն կողմ գրված է Ադրբեջանի հանրապետություն»,- ասաց Ալեն Սիմոնյանը։

Տեղից արձագանքեց «Հայաստան» խմբակցության պատգամավոր Արմեն Ռուստամյանը։

Ալեն Սիմոնյանը պատասխանեց. «Տեղից արձագանքել պետք չէ, կգնաք ձեր մոտ նիստ կանեք, շրջաբերականներ կպտտացնեք և դրանց մեջ կգրեք, թե ինչ պետք է անել,որ հանկարծ Արցախի հարցն առաջ չգնա և մենք խաղաղության պայմանագիր չկնքենք։ Ձեր ոճը դա է»։

Անդրադառնալով օրինագծին՝ Սիմոնյանն ասաց, որ ԱԺ խորհորդը հարցը քննարկել է իսկ ԱԺ դահլիճում այն կդրվի քվեարկության։

«Պարոն Սիմոնյան, փաստորեն իմ հորդորը չանցավ, դուք շարունակում եք ստել ու կեղծել։ «Վարչատարածքային բաժանման մասին» օրենքը բացարձակ կապ չունի Արցախի հարցի հետ, խորհրդակցեք իրավաբանների հետ։ Այն ինչը հիմա դուք փորձում եք մանիպուլացնել՝ ոչ միայն չի անցնում, ոչ միայն տրամաբանական չէ, որովհետև ի սկզբանե կեղծ է, այլ փորձում եք ձեր վարքագիծը, որը ոչ ավել ոչ պակաս բնութագրվում է դավաճանական, արդարացնել դիմացինի ազգանվեր գործունեությունը մանիպուլիացիայի ենթարկելով»,-ասաց Մինասյանը և շեշտեց, որ երբ նախկին գումարման ԱԺ պատգամավորները քվեարկել են «Վարչատարածքային բաժանման մասին» օրենքի ընդունման օգտին՝ Ալեն Սիմոնյանի ակնարկած տրամաբանությունը չի եղել հիշատակված օրենքի մեջ։
 

Հարցուպատասխանին հաջորդած իր ելույթում Արծվիկ Մինասյանը նկատեց, որ եթե «Վարչատարածքային բաժանման մասին» օրենքին կողմ քվեարկած պատգամավոր Նիկոլ Փաշինյանը այն արել է Արցախն Ադրբեջանի կազմում ճանաչելու հիմնավորմամբ, ապա այն նշանակում է, որ ի սկզբանե Փաշինյանը նպատակադրված էր եղել Արցախը պատերազմով հանձնե Ադրբեջանին։