Ձեր վստահելի աղբյուրը

Այսօր տեղի ունեցավ Մերգելյանի հիմնանորոգված պուրակի բացումը։ Երևանի Կոմիտաս փողոցի սկզբնամասում գտնվող, նշանավոր մաթեմատիկոս Սերգեյ Մերգելյանի անունը կրող այգին տարիներ շարունակ անմխթար վիճակում էր, իսկ այսօր դարձել է անճանաչելի՝ հարակից  շենքերի բնակիչների խոսքով՝ «հրաշալի ու հոյակապ տարածք»։

Այգու տարածքում է տեղադրվել նաև  ՀՀ վաստակավոր նկարիչ, քանդակագործ Տիգրան Արզումանյանի  «Լեռնային պար» հայտնի խմբաքանդակը, որն 1984 թվականից տեղադրված է եղել Երևանի Պարոնյան փողոցի հ.40 հասցեի «Դվին» հյուրանոցի առջևի հրապարակում:

«Այս արձանը հայի միասնական ոգու արտացոլումն է, հայկական պարը՝ լեռնապարը։ Մեր ամբողջ ժողովրդի լեռնապարն է։ Մենք մեր լեռների պես կանգուն ենք՝ միշտ, այսօր և ապագայում»,- այգու վերաբացման ժամանակ ասաց Տիգրան Արզումանյանը։

Երևանի քաղաքապետ Տիգրան Ավինյանի ներկայացմամբ, հիմնանորոգումից հետո այգին դարձել է հարմարավետ, բարեկարգ ու ժամանակակից։

Փետրվարից մեկնարկել էր շուրջ 5000 քառակուսի մետր տարածք զբաղեցնող այգու տարածքի բարեկարգման աշխատանքները։ Տարածքը կանաչապատվել է, կառուցվել է  խաղահրապարակ, ամֆիթատրոն, զրուցատաղավար, տեղադրվել են նստարաններ, վերանորոգվել է ցայտաղբյուրը։

Այսօր տնկվեց շուրջ 70 ծառ։

«Մերգելյանի այգու նախագիծը բազմաթիվ քննարկումների փուլեր է անցել, այդ թվում հանրային քննարկումներ։ Դրվել է «Ակտիվ քաղաքացի» հարթակում, որտեղ մարդիկ հնարավորություն են ունեցել քվեարկել իրենց նախընտրած նախագծերի համար, թողնել մեկնաբանություններ։ Այդ մեկնաբանությունների հիմքով նախագծերը շտկվել են և փաստացի ունենք նախագիծ, որն անցել է հանրային քննարկման բոլոր փուլերը»,- ասաց Տ.Ավինյանը։

Հարակից շենքերի բնակիչները շատ գոհ են կատարված աշխատանքից։

«Ոչ մի բան պակաս  բան չեմ տեսնում»։ «Ինձ շատ դուր եկավ». Panorama.am-ի հետ զրույցում ասացին քաղաքացիները։

Ներկաներից մեկը միայն նշեց, որ խաղահրապարակը փոքր է, կարելի էր այլ հատվածներում էլ  խաղահրապարակներ անել։

«Ծնողները կարող են հանգիստ թողնել երեխաներին այս մաքուր, անվտանգ զբոսայգում»,- նշեց քաղաքացիներից մեկը։

Մանրամասն՝ տեսանյութում։