Ձեր վստահելի աղբյուրը

«Ստեղծված աշխարհաքաղաքական և տնտեսական անորոշությունների պայմաններում առկա են ռիսկեր տնտեսական ներուժն ապահովող գործոնների կայունության  և տնտեսական հեռանկարի հնարավոր սցենարի տեսանկյունից»,-ներկայացնելով 2025 թվականի պետական բյուջեի վերաբերյալ ԿԲ-ի կարծիքը՝ խորհրդարանում հայտարարեց Մարտին Գալստյանը։

Նրա խոսքով՝ հաշվի առնելով տնտեսական աճի ռիսկերի և անորոշությունների մեծ լինելը, կարևոր է պահուստային ֆոնդի ձևավորումը և դրա օգտագործման խիստ սահմանափակումը՝ ուղղված բացառապես մակրոտնտեսական ռիսկերից բխող լրացուցիչ ֆինանսական պահանջների ծածկմանը։

«Կապիտալ ծախսերի աճը նախորդ տարիների համեմատ կլինի զգալիորեն դանդաղ՝ ընդամենը ՀՆԱ-ում 0.3 տոկոսային կետ, փոխարենն առաջանցիկ աճ է ապահովում ընթացիկ ծախսերը 0.8 տոկոսային կետ»,- հայտնեն Գալստյանը և հավելեց. «ՀՆԱ-ում հարկերի նախանշված աճի և ծախսերի զգալի ավելացման արդյունքում բյուջեի պակասուրդ/ՀՆԱ հարաբերակցության գծով  ծրագրավորվել է էական աճ՝ մինչև բյուջեի 5.5 % մակարդակը, ինչի արդյունքում հարկաբյուջետային քաղաքականությունն ամբողջական պահանջարկի վրա կունենա չեզոքից մի փոքր ավելի ընդլայնող ազդեցություն»։ 

ԿԲ նախագահի խոսքով՝ պետք է թիրախավորել ընթացիկ ծախսերի նվազեցումը և կապիտալ ծախսերն էականորեն մեծացումը։

«Կառավարության պարտք/ՀՆԱ հարաբերակցությունը նախորդ տարվա համեմատ կաճի ավելի մեծ չափով՝ 3.2 տոկոսային կետով և կկազմի 53%՝ ձևավորվելով հարկաբյուջետային կանոններով սահմանված շեմային 50%-ից բարձր»,- հայտնեց Մարտին Գալստյանը և նշեց, որ մինչև տարվա վերջ պարտք/ՀՆԱ-ն կայուն կմնա 54.6 %-ի մակարդակում։