Վրաստանում կողմերը վա բանկ են գնացել. Դեռ զարգացումներ կլինեն. Ջոնի Մելիքյան
«Արևմուտքում նույնիսկ Բլինքենի, Շարլ Միշելի հայտարարություններից հետո տեղ է թողնվում Վրաստանի իշխանությունների հետ կոնսենսուսի գալու համար»,-Panorama.am-ի հետ զրույցում ասաց Վրաստանի հարցերով փորձագետ Ջոնի Մելիքյանը՝ անդրադառնալով Վրաստանում հետնընտրական հնարավոր զարգացումներին վերաբերյալ հարցին։
Նրա խոսքով, մի կողմից Արևմուտքը ստեղծում է իրավիճակ, երբ ընդդիմությունը կարող է բողոքի ցույցերով ինչ-որ պրոցես սկսել ու արդյունքի հասնել, եթե խոչընդոտներ չլինեն, մյուս կողմից էլ կտրուկ ձևակերպումներ չեն օգտագործում, որ Թբիլիսիի հետ ամբողջովին չխզեն կապերը։
«Եթե որոշ ժամանակ անց փողոցային պայքարում պրոգրես չլինի, Արևմուտքը սկսի կոմպրոմիսային քայլեր անել, այսօր արդեն բոլոր հայտարարություններում կարմիր թելի պես գնում է այն միտքը, որ Վրաստանի իշխանությունները պետք է վերահստատեն իրենց եվրոպական ընտրությունը։ Այս ամենը հենց այնպես չի արվում։ Հիմա տեսնենք՝ հաջորդ բողոքի ցույցն ինչպիսին կլինի»,-ասաց Մելիքյանը։
Նա նշեց, որ երեկ Վրաստանի մայրաքաղաք Թբիլիսիում կայացած հանրահավաքին տարբեր հաշվարկներով մասնակցել է մինչև 20 հազար մարդ, ինչը միջին ցուցանիշ է ու լուրջ բողոքի ալիք կոչել չի կարելի, որը կարող էր սկիզբ դնել գործընթացների։
«Եթե այս թիվը չավելանա ու պրոցեսը սկսի մարել, ապա խաղի այլ կանոոններ պետք է մշակել։ Այստեղ ինտրինգը նաև այն է, թե խորհրադարան անցած «Վրացական երազանք»-ի նախկին գործընկեր Գախարիան ի՞նչ կանի՝ ընդդիմադիր ուժերի հետ վայր կդնի՞ մանդատները, թե՞ կորոշի խորհրդարանի ներսում լինել»,-ասաց Մելիքյանը։
Վրացական ընդդիմությունը նախօրեին տեղի ունեցած հանարհավաքում պահանջում էր նոր խորհրդարանական ընտրություններ անցկացնել։ Ջ. Մելիքյանը հնարավոր չի համարում այս տարբերակը, քանի որ «Վրացական երազանքի» ու երկրորդ տեղը զբաղեցրած ուժի քվեների միջև տարբերությունն ահռելի է։
«Կողմերը վա բանկ գնացին։ Այնպիսի իրավիճակ է, որ ընդդիմությունը պետք է ինչ-որ բան փողոցի միջոցով անի, կամ էլ կոնսուլտացիաների միջոցով որոշի, եթե չկա լծակ՝ իշխանության վրա ազդելու, որ արտահերթ ընտրություններ անցկացվեն, ուրեմն ինչ-որ ձևով պետք է պահպանեն այն քվեները, որ ստացել են, իրենց ընտրած մարդկանց հուսախաբ չանեն ու պառլամենտում ընդդիմադիր գործունեությամբ զբաղվեն։ Տեսնենք, շատ բան արտաքին ճնշումից ու գործոնից է կախված»,-ասաց նա։
Հարցազրույցի մանրամասները՝ ձայնագրությամբ։
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
