Ձեր վստահելի աղբյուրը

«Բացարձակ որևէ խնդիր Հանրապետական կուսակցության հետ չունենք, ունենք մեկ թիրախ, մեկ օրակարգ՝ այս իշխանության հեռացումը, իսկ թե ինչ գործողություններ կլինեն ապագայում, այդ մասին կհայտարարենք»,- ԱԺ-ում լրագրողների հետ ճեպազրույցում ասաց  ԱԺ «Հայաստան» խմբակցության պատգամավոր, ՀՅԴ ԳՄ ներկայացուցիչ Իշխան Սաղաթելյանը։

«Այն տպավորությունը, որ փորձում են որոշները ստեղծել, թե խորհրդարանական ընդդիմությունը հաշտ է այս իրավիճակի հետ, այլևս հնարավոր չէ որևէ բան անել, գնում ենք հերթական ընտրությունների, առնվազն մենք, այդպես չենք մտածում և չենք կարծում՝ այս իշխանությունը պետք է հասնի 2026 թվական»,- ասաց նա:

Անդրադառնալով ԱԳ նախարար Արարատ Միրզոյանի՝  «Հայոց ցեղասպանության միջազգային ճանաչումն իրենց թիվ մեկ առաջնահերթությունը չէ»  հայտարարությանը՝  Ի.Սաղաթելյանն ասաց, որ այս իշխանության պարագայում իր  համար այդ հայտարարությունը զարմանալի չէ, այլ նաև օրինաչափ է:

«Արարատ Միրզոյանը նաև ծանր ակնարկ արեց, որը Թուրքիայի խոսույթն է՝ նման հարցերը թող պատմաբանները քննարկեն: Դա տարիներ շարունակ ասվել է Թուրքիայի կողմից։ Արարատ Միրզոյանից և Նիկոլ Փաշինյանից այլ բան սպասել հնարավոր չէ: Երբ ասում են՝ դա պատմական հեռավոր անցյալում տեղի ունեցած իրադարձություն է, ընդամենը մեկ տարի առաջ Արցախում տեղի ունեցավ էթնիկ զտում, ցեղասպանություն: Նաև այսօր հայտարարեց, որ այդ հարցով էլ իրենք հաշտ են, օրակարգ չունեն:

Իրենց և Ալիևի խոսույթը վաղուց չի տարբերվում: Երկու տեղ են ասում, որ Արցախի հակամարտության հարցը լուծված է, փակված է՝ էրդողանը և Բայրամովը,  Արարատ Միրզոյանն ու Նիկոլ Փաշինյանը:

Սրանց ուրացման քաղաքականությունը շարունակվում է և գնալով ավելի է խորանալու»,- ասաց Իշխան Սաղաթելյանը: