«Ժողովուրդ». Պետությունը գումար է տվել հարկատուների հաշվին, որ մասնավորը բիզնես սկսի
«Ժողովուրդ» թերթը գրում է.
«Նիկոլ Փաշինյանի իշխանության ամենախոշոր ձախողումը վստահաբար «Հայաստանի պետական հետաքրքրությունների ֆոնդ» ՓԲԸ-ի՝ ԱՆԻՖ-ի գոյությունն ու կտրուկ անհետացումն է՝ կոռուպցիոն ռիսկերով և դրսևորումներով: «Ժողովուրդ» օրաթերթը պաշտոնական աղբյուրներից տեղեկացավ, որ ԱՆԻՖ-ի դուստր «Ձեռնարկատեր+պետություն հակաճգնաժամային ներդրումների կառավարիչ» ՓԲԸ-ն բաժնեմասային ներդրում էր իրականացրել «Ապագա Փրոջեքթս» ՓԲԸ-ում։
«Ապագա Փրոջեքթս» ՓԲԸ-ն համակարգում է մեզ քաջ հայտնի երկու ծրագիր Տավուշի մարզի Ենոքավան համայնքում՝ «Ապագա ռեզորթ» հյուրանոցային համալիրը և «Յելլ Էքստրիմ Փարք» զվարճությունների այգին։ Այսինքն՝ պետությունը գումար է տվել հարկատուների հաշվին, որ մասնավորը բիզնես սկսի: Երկու ծրագրերը գյուղական համայնքներում տուրիստական ենթակառուցվածքների զարգացման և տնտեսական նոր հնարավորությունների ստեղծման հաջող օրինակ են, անշուշտ։ ԱՆԻՖ-ի և «Ապագա Փրոջեքթս» ՓԲԸ-ի միջև համագործակցության արդյունքում կառուցվել է «Յելլ Էքստրիմ Փարք»-ի նոր՝ մոտ 2,5 կմ երկարությամբ զիփլայնը և սպորտային զվարճության հարթակը։ Ինչպես նաև ներդրումներ էին իրականացվել «Ապագա Ռեզորթ» հյուրանոցային համալիրի ենթակառուցվածքների զարգացման և համարային ֆոնդի ավելացման համար։ Ֆոնդի մասնակցությունը այս ծրագրում կազմել է 25% – 49%, մասնակցության չափը մեկ ծրագրում՝ 0.5 – 4 մլն ԱՄՆ դոլարին համարժեք դրամ։ Ծրագրի ընդհանուր արժեքը կազմել է 798 մլն ՀՀ դրամ` գրեթե 2 մլն դոլար։
Հավելենք նաև, որ «Ապագա Փրոջեքթս» ՓԲԸ-ն գրանցված է Տավուշի մարզի Ենոքավան համայնքում։ ՓԲԸ-ի հիմնադիրը Տիգրան Չիբուխչյանն է. նա ընկերությունում ունի 22.9% բաժնեմաս։ Իրական շահառուների մասին հայտարարագրում շահառու է նաև ԱՄՆ քաղաքացի Ամուր Ավակյանը, ով ունի 19.6% բաժնեմաս։ Իրական շահառուների ցանկում է նաև Իրինա Չիբուխչյանը 26.3% բաժնեմասով և Արտակ Չիբուխչյանը՝ կրկին 26.3% բաժնեմասով։ «Ապագա Փրոջեքթս» ՓԲԸ-ի 4.7% բաժնետեր է նաև Արսեն Գաբրիելյանը։
Հավելենք նաև, որ ՀՀ կառավարության որոշմամբ՝ ներդրվել էր 4 մլրդ 734 մլն ՀՀ դրամ «Էյր Արաբիա» ընկերության հետ համատեղ հիմնված ազգային ավիափոխադրող «Հայկական ազգային ավիաուղիներ» ՓԲԸ-ի («Ֆլայ Արնա») բաժնետոմսերի դիմաց վճարման համար։
«Հայաստանի պետական հետաքրքրությունների ֆոնդ» ՓԲԸ-ն ավիաընկերության՝ «Հայկական ազգային ավիաուղիներ» ՓԲԸ-ի 49 % բաժնետերն էր նաև։ ԱՆԻՖ-ը նաև ներդրումներ է արել Hard Rock սրճարանում, Fly Arna ավիաընկերությունում, Ֆոնդը նաև արաբական Masdar-ի հետ իրականացրել էր «Այգ-1» ծրագիրը։
Հիշեցնենք, որ Նիկոլ Փաշինյանի ձախողված ԱՆԻՖ-ը, 13 մլն դոլարի ներդրմամբ բացվելուց հետո, 5 տարի գործեց, չարդարացրեց իրեն, և դեռ 5 միլիոն դոլար էլ պետբյուջեից կրկին հատկացվեց, որ լուծարվի: Կարճ ասած՝ ԱՆԻՖ-ը մեր բյուջեի վրա արժեցավ 18 մլն դոլար: Թե ովքեր են ԱՆԻՖ-ից օգտված «մասնավորները», կներկայացնենք հաջորդիվ»։
Մանրամասները թերթի այսօրվա համարում։
Լրահոս
Տեսանյութեր
Ռուբեն Քոչարը կասկածներ ունի՝ Երվանդ Քոչարի թանգարանում կան գործեր, որոնք կեղծիք են. փաստաբան
