Ձեր վստահելի աղբյուրը

Բարձրագույն դատական խորհրդի որոշմամբ՝ դատավոր Ռազմիկ Մարիկյանին հայտարարվեց նկատողություն։

«Բարձրագույն դատական խորհուրդը, քննելով արդարադատության նախարար Գրիգոր Մինասյանի միջնորդությունը Երևան քաղաքի առաջին ատյանի ընդհանուր իրավասության քրեական դատարանի դատավորի Ռազմիկ Մարիկյանին կարգապահական  պատասխանատվության ենթարկելու վերաբերյալ, որոշեց բավարարել, Ռազմիկ Մարիկյանին հայտարարել նկատողություն»,- որոշումը  ներկայացրել ԲԽԴ նախագահ Կարեն Անդրեասյանը։

Նա հայտնեց, որ ԲԴԽ անդամներ Էդգար Հովհաննիսյանն ու Արթուր Աթաբեկյանը դեմ են քվեարկել որոշմանը և ունեն հատուկ կարծիք։

«Միաժամանակ խորհուրդը հարկ է համարում նշել, որ դատավորը  բավարար չափով չի հիմնավորել և պատճառաբանել  մեղադրյալի  նկատմամբ կիրառված այլընտրանքային խափանման միջոցների համակցությունն ու կալանքի չկիրառման անհրաժեշտությունը։

Արդյունքում, դատավորի կողմից  խախտվել են դատավարական իրավունքի  վերաբերալի նորմեր, որոնք հանգեցրել են վարքագծի  կանոնների խախտումների՝ առաջացնելով դատական իշխանությունը վարկաբեկող, ինչպես նաև դատական  իշխանության անկախության և անաչառության վերաբերյալ հանրության  վստահությունը նվազեցնող վարքագծի դրսևորման»,- ասաց Կարեն Անդրեասյանը։

Մի շարք փաստաբաններ անդրադաձել է ԲԴԽ այս որոշմանը։ 

Փաստաբան Աբգար Պողոսյանը գրել է.

«Իրական արդարադատություն իրականցնող անձիք ԲԴԽ-ի թիրախում։

Այսօր հայտնի դարձավ, որ Դատավոր Ռազմիկ Մարիկյանին հայտարարվեց նկատողություն։ Սա
հերթական աննախադեպ ամենաթողությունն է։

Փաստացի վտանգավոր ռեպրեսիա է, որը կարող է կաշկանդել դատավորներին։
Ոլորտին անգամ փոքր առնչություն ունեցող մարդկանց հայտնի է, որ Պարոն Մարիկյանն օբյեկտիվ և անկողմնակալ դատավոր է, մարդ, ով մեծ հարգանք և հեղինակություն ունի։

Սա, երևի թե, կարևորագույն շարժառիթներից էր»։ 

Փաստաբան Վարդուհի Սարգսյանը կիսվել է Կարեն Անդրեասյանի՝ Ռազմիկ Մարիկյանին նկատողություն հայտարարելու որոշումն ընթերցելու տեսանյութով ու գրել. «Հայաստանում ստեղծվել է մի վիճակ, երբ դատավորների ակտերը վիճարկվում են ոչ թե վերադաս դատարաններում, այլ Անդրեասյան Կարենի կամայականությունների «դյուքյանում»։ Սա խոսուն վկայությունն է այն բանի, որ քրեական գործերով բազմաթիվ դատավորներ, ովքեր չեն ցանկանում գործել ապօրինություններ, ամեն օր ենթարկվում են ճնշումների իրենց կայացրած ակտերի համար»։ 

Փաստաբան Սոս Հակոբյանը գրել է. «ԲԴԽ-ն դատավոր Մարիկյանի գործով հստակորեն իրականացրեց վերադաս ատյանի գործառույթ՝ ասելով, թե դատավորը լավ չի պատճառաբանել կալանքի փոխարեն տնային կալանք խափանման միջոց կիրառելը, ինչի անթույլատրելիության մասին նույն Կարեն Անդրեասյանը երկար ճառ էր կարդում այդ գործով տեղի ունեցած դատաքննությանը...

Ենթարկել՝ սա է ԲԴԽ միակ նպատակը դատական իշխանության մասով, ինչը նույնիսկ կոռուպցիայից ավելի խայտառակ դրսևորում է...»։ 

Գայանե Պապոյանը, անդրադառնալով ԲԴԽ որոշմանը, գրել է. 

«Դատական իշխանությունը պարբերաբար հեղինակազրկվում է ԲԴԽ որոշումների և նիստերի արդյունքում, այլ ոչ թե դատավորների կայացրած դատական ակտերի հետևանքով:

Դատավոր Ռազմիկ Մարիկյանին կարգապահական պատասխանատվության ենթարկելու որոշումը դրա վառ ապացույցներից մեկն է։

Իրավամբ անհասկանալի է, թե ինչպե՞ս ԲԴԽ-ն կարող էր չբեկանված (այսինքն՝ օրինական և հիմնավոր) դատական ակտի պայմաններում կայացնել այն որոշումը, որը հրապարակվեց այսօր։
Թերևս դատավոր Մարիկյանի կողմից կայացվող համարձակ և օրինական դատական ակտերը երևի թե վախեցնում են ԲԴԽ նախագահին և որոշ անդամներին, ինչով պայմանավորված էլ որոշեցին «ստանձնել» վերաքննիչ դատարանի դերը և չբեկանված դատական ակտի պայմաններում որոշել, որ դատավորը հիմնավոր դատական ակտ չի կայացրել։

ՀԳ. ՔԴՕ 9-րդ հոդվածի 4-րդ մասի համաձայն՝ Դատավարական ակտի օրինականությունը և հիմնավորվածությունը կարող են հերքվել միայն պատշաճ իրավական ընթացակարգի շրջանակներում դրա ստուգման արդյունքով:

Հ.Գ. Այս գործով միջնորդությունը «մի կերպ»ներկայացնող անձն էլ այնպիսի շեշտադրումներ էր կատարում և  նրա խոսքից նաև ենթադրելի էր, որ, եթե նախաքննական մարմինը գտել է, որ կալանքն է ի զորու և ներկայացրել է կալանքի վերաբերյալ միջնորդություն, ուրեմն այն ենթակա է անվերապահ բավարարման, դատավորը չի կարող ինքնուրույն որոշել տվյալ տեսակի խափանման միջոց կիրառելու հիմքերն առկա են թե ոչ, դատավորը պետք է ուղղակի ստորագրեր և կնքեր քննիչի ներկայացրածը...((»։ 

Փաստաբան Հրանտ Վարդանյանը գրել է. 

«Դատական ակտի կայունություն հատկացողություն Հայաստանի Հանրապետությունում այլևս գոյություն չունի։

 ԲԴԽ- ն, ԴԱՏԱՎՈՐ Ռազմիկ Մարիկյանին կարգապահական պատասխանատվության ենթարկելով, դե ֆակտո վերացրեց դատավորների ինքնուրույնությունը՝ անուղղակի պարտադրելով  դատավորներին քննիչի միջնորդությունը հասկանալ որպես ցուցում…»։