Ձեր վստահելի աղբյուրը

«Իմնեմնիմի»-ի գործով դատական նիստին որպես վկա հրավիրված Կարինե Ասլիկյանը հայտարարեց, որ անձնապես չի ճանաչում գործով անցնող Վազգեն Սաղաթելյանին և Նարեկ Սամսոնյանին, բայց որպես հաղորդավարները՝  «դեմքերը ծանոթ է»։

Մեղադրողը հարցրեց. «Նայել եք հաղորդումը, իրենց ճանաչում եք որպես հաղորդավարներ, «Իմնեմնիմի»-ի  հաղորդումները նայելիս,  բացի բուն բովանդակությունը, քննարկումները,  վերլուծություններ, եղե՞լ է արտառոց բան, որ ձեզ դուր չի եկել»։

Վկան հստակ պատասխանեց. «Ոչ։ Բացասական էմոցիա չի եղել»։

Հարցին՝ հայհոյանքներ հնչե՞լ են հաղորդման ընթացքում, վկան ասաց. «Հնչել են, բայց հայհոյանքների իմաստը ես չեմ հասկանում, ինձ թարգմանիչ է պետք, որ ես հասկանամ հայհոյանքների իմաստը»։

Նա նշեց, որ հասկանում է՝ հայհոյանքը վիրավորական է, բայց իրեն բացարձակ տհաճություն, անհանգստություն չի պատճառել. «Հաղորդումը բազմաբովանդակ է, ինձ ավելի շատ դա է հետաքրքրել, քան հայհոյանքի մասը»։

Վկան ասաց, որ հաղորդումները դիտում է 2023 թվականից, իրեն շատ հետաքրքրել են։

Մեղադրողը հարցրեց. «Դուք նայում էիք հաղորդում,  լսում հայհոյանքը, այդ պահի դրությամբ ձեր մոտ ի՞նչ էր առաջանում՝ շարունակել լսե՞լ հայհոյանքը, անջատե՞լ, ձեր մոտ հարց էր առաջանո՞ւմ՝ ինչու, օրինակ, այդ հայհոյանքը հնչեց»։

Վկան պատասխանեց. «Շարունակել լսել, քանի որ հաղորդման մեջ ավելի հետաքրքիր բաներ կային»։

Մեղադրողի մեկ այլ հարցին՝  հայհոյանքերը պարբերաբար հնչում են, կցանկանայի՞ք լսել այդ հայոհյանքնեը, նա պատասխանեց. «Հայհոյանքերը ոչ, բայց հաղորդումը կուզեի լսել։ Չէի ցանկանա լսել... դե ամեն դեպքում հաճելի չէ։
Ես կուզեի հաղորդումը շարունակվեր առանց հայհոյանքների»։

«Իմնեմնիմի» փոդքասթի համահեղինակ, «Իմնեմնիմիի գործով» մեղադրյալ Վազգեն Սաղաթելյանը շնորհակալություն հայտնեց տիկին Կարինեին՝ իրենց հաղորդումը  դիտելու համար, ցավում է, որ այս ամենի միջով անցնում է։

«Մեզ մեղսագրվում է, որ այն բառամթերքը, որ մենք օգտագործել ենք հաղորդման մեջ, կարող էր  մարդկանց մոտ առաջացնել տագնապ, իրենց  անդորրը խափանել։ Մենք բոլորս այստեղ հասկանում ենք, որ  հայհոյանք լսելը, հատկապես կանանց համար, շատերի համար, հաճելի չէ։ Մենք չենք էլ առարկում։ Դուք նայում եք հաղորդում, որտեղ կա  բովանդակություն, որը ձեզ հետաքրքիր է, նաև կան հայհոյանքներ։ Ես ճի՞շտ եմ հասկանում, որ բովանդակության  հետաքրքրությունը ձեզ համար առավել կարևոր է, քան մեկ ժամում մեկ հայհոյանքը լսելը։ Ձեզ համար մեկ ժամում մեկ հայհոյանքն ընդունելի պայմա՞ն է այդ հաղորդումը շարունակել դիտելու համար։

Ձեզ համար խոչընդոտ չի՞ հանդիսանում դա, որպեսզի հետաքրքրությամբ ու ցանկությամբ դիտեք այդ հաղորդումը ու շարունակեք դիտել ու ցանկանաք, որ դա շարունակվի»,- վկային դիմելով՝ ասաց Վազգեն Սաղաթելյանը։

Վկան ասաց. «Ոչ, կուզեմ դիտել այդ հաղորդումը։ Իհարկե, լավ կլինի, հայհոյանք չլինի»։

Պաշտպան Ռուբեն Մելիքյանը հարցրեց. «Այդ արտահայտությունները  լսելով՝ ձեր անդորրը խանգարվե՞լ է, թե՞ ոչ, տագնապի զգացում ունեցե՞լ եք, թե՞ ոչ»։

Վկան ասաց. «Ոչ»։

«Իմնեմնիմի» փոդքասթի համահեղինակ, «Իմնեմնիմիի գործով» մեղադրյալ Նարեկ Սամսոնյանն էլ հարցրեց.  Կուզե՞ք մենք վերադառնանք ու վարենք հաղորդումը, սպասո՞ւմ եք, որ մենք վերադառնանք ու վարենք», վկան ասաց. «Այո»։

Դատավոր Արման Հովհաննիսյանի հարցերին պատասխանելով՝ Կարինե Ասլիկյանն ասաց, որ ինքը մտել է հատուկ «Յութուբ»՝ նայելու այդ հաղորդաշարը։

«Մեկ անգամ նայելուց հետո, պարբերաբար նայել եմ։ Հաղորդումը բազմաբովանդակ էր, հետաքրքիր էր, ունենում էինք հետաքրքիր հյուրերը, խորհուրդ էին տալիս՝ ինչ ֆիլմ նայենք։ Իրենց  խորհուրդով նայեցի «Слово пацана» ֆիլմը։ Իմ ուշադրությունը չէր գրավել այդ ֆիլմը վերնագրի առումով, բայց իրենց խորհուրդով նայեցի»,-ասաց վկան։ 

Հիշեցնենք, որ «Իմնեմնիմի» պոդքասթի 83-րդ թողարկման ընթացքում Նիկոլ Փաշինյանին սուր քննադատության ենթարկելու համար երկու ամիս անազատության մեջ անցկացրած Նարեկ Սամսոնյանն ու Վազգեն Սաղաթելյանտ դատարանի որոշմամբ ազատ են արձակվել այս տարվա մայիսի 21-ին։

Երևանի քրեական դատարանի Ավան նստավայրի դատավոր Արման Հովհաննիսյանի որոշմամբ, խափանման միջոց կալանքը վերացվել էր, նրանց նկատմամբ ընտրվել էր վարչական վերահսկողություն, նրանք երեք ամիս չեն կարող վարել «Իմնեմնիմի»-ն կամ որևէ այլ հաղորդում։

Հանրային մեղադրողն ընդհանուր իրավասության դատարանում նախ միջնորդել է փոխել նրանց նկատմամբ խափանման միջոցը՝ ընտրելով կալանավորումը, սակայն դատարանը չէր բավարարել միջնորդությունը։

Դրանից հետո դատախազը բողոքարկել էր որոշումը Վերաքննիչ դատարանում, վերջինն անփոփոխ էր թողել առաջին ատյանի որոշումը։

Մանրամասն՝ տեսանյութում։