Ձեր վստահելի աղբյուրը

«Երևանի քաղաքապետարանին եմ հարցնում՝ տղե՛րք, երբ օրական 600 հազար ուղևորափոխադրում էիք ներկայացրել, ինչպես էիք այն հաշվել։ Եթե առաջնորդվեինք այդ թվով՝ այսօր իրենք պետք է հավաքեին 60 մլն դրամ, բայց հավաքել են 35 մլն դրամ»,- 168TV-ի «Ռեվյու» հաղորդաշարի եթերում ասել է Երևանի ավագանու «Մայր Հայաստան» խմբակցութան անդամ Մեսրոպ Մանուկյանը։

Նրա խոսքով Երևանի քաղաքապետարանը «Թել-Սել» ընկերության հետ 2023 թվականի հունվարի 4-ին կնքել է պայմանագիր, ըստ որի՝ այս ընկերությունը պարտավորվել է Երևանում ներդնել տրանսպորտի միասնական տոմսային համակարգ։ Այս ընկերության հետ Երևանի քաղաքապետարանը պայմանագիր է կնքել երկրորդ անգամ հայտարարված մրցույթից հետո, և այդ պայմանագիրն ուղղակի «կարվել է» «Թել-Սել» ընկերության հագով։

«Այս ընկերությունը, որը միասնական տոմսային համակարգ պետք է ներդներ Երևանում, նախքան մայրաքաղաքում դա անելը, պետք է ունենար 3 այլ քաղաքում 200 ավտոբուսի համար միասնական տոմսային համակարգի գործարկման փորձ, ինչը, սակայն, «Թել-Սել» ընկերությունը չունի»,- ասաց Մանուկյանը՝ խոսելով Երևանի քաղաքապետարանի և «Թել-Սել» ընկերության միջև 5 տարով կնքված պայմանագրի այլ խնդրահարույց կետերի մասին ևս։

Ավագանու անդամի խոսքով, պայմանագրի մեկ այլ կետով «Թել-Սել» ընկերությունը պարտավորվել է միասնական տոմսային համակարգի ներդրման համար ունենալ արտոնագրեր՝ VISA, MasterCard (EMV Contactless) և Արմենիան Քարդ (ARCA) վճարային համակարգերի կողմից, ինչպես նաև ապահովել անհպում (NFC) վճարումների ընդունումը Apple Pay, Google Pay, Samsung Pay և այլ վճարային հավելվածներով, ինչը, սակայն, «Թել-Սել» ընկերությունը չի կարողանում անել։

Մանուկյանը նշեց, որ խնդրի վերաբերյալ բարձրաձայնելուց հետո երբ ԿԲ-ի դիմացով անցնում էր այնտեղ աշխատող իր համակուրսեցինը հայտնեցին որ իր ուղիղ կապից հետո գործադիրից ԿԲ-ին և քաղաքապատարանին պարտադրել են «Թել-Սել»-ի փոխարեն այդ ապարատները հագեցնեն այդ ծառայություններով։