Ձեր վստահելի աղբյուրը

Նոյեմբերի 9-ին մեկնարկում է հանրակրթական դպրոցների ուսուցիչների 2024 թվականի կամավոր ատեստավորման գործընթացը։

«Այս տարի առաջին անգամ կամավոր ատեստավորման գործընթացն իրականացվելու է էլեկտրոնային ձևաչափով։ Գործընթացը մեկնակում է  նոյեմբերի 9-ին, ավարտվելու է  նոյեմբերի 24-ին։ Բոլոր մարզերում և Երևանում քննական 35 կենտրոններում ստեղծվել են պայմաններ, որպեսզի ատեստավորման գործընթացն այդտեղ  կազմակերպվի»,-ասուլիսում ասաց կրթության, գիտության, մշակույթի և սպորտի նախարարի տեղակալ Արաքսիա Սվաջյանը։

Նա տեղեկացրեց, որ այս տարի կամավոր ատեստավորման համար գրանցվել են 5620 աշխատող ուսուցիչներ, 572 չաշխատող անձինք, որոնց մեջ մտնում են նաև նախնական և միջին  մասնագիտական  ուսումնական հաստատություններում հանրակրթական առարկաներ դասավանդող մանկավարժները։

«Այս տարի նաև պարտադիր պայման է՝ նախորդ  տարիներին կամավոր ատեստավորում չհաղթահարած շուրջ 360 ուսուցիչները ևս պետք է պարտադիր մասնակցեն  կամավոր ատեստավորմանը։ Հերթական  ատեստավորման շրջանակներում 607 ուսուցիչների համար նշվել է  առարկայական  գիտելիքի իմացության խնդիր, կարիք, որը ևս կամավոր  ատեստավաման շրջանակնում է ատեստավորումը կազմակերպվելու»,- ասաց փոխնախարարը։

Նա հույս հայտնեց, որ այս տարի բավական լավ արդյունքներ կունենան։

Արաքսիա Սվաջյանն ասաց, որ այս տարի  ստիպված կլինեն ընդհատել պայմանագիրը բոլոր այն ուսուցիչների հետ, որոնք  երկրորդ կամ ավելի տարի հաղթահարած չեն լինի կամավոր  ատեստավորումը։

«Հույս ունենք՝ այս նոր  ձևաչափով թեստի անցկացումը հնարավորություն է տալու ավելի շատ ուսուցիչներ հաղթահարեն շեմը»,- ասաց փոխնախարարը։

Նա տեղեկացրեց, որ թեստերի 60 տոկոսը հաղթահարելու դեպքում դրույքաչափի փոփոխություն է տեղի ունենում. ուսուցիչներն ունենում են 200 հազար դրամ  դրույքաչափ, համապատասխան  արդյունքների գրանցման դեպքում՝ 70-79, 80-89, 90-100 տոկոս արդեն ունենում են 30,40,50 տոկոս հավելավճարի հնարավորություն։

5 տարի կամավոր ատեստավորման արդյունքները շարունակում են գործել՝ անկախ նրանից, թե ուսուցիչը որ դպրոցում կաշխատի։

Փախնախարարն ասաց, որ  իրենց մտահոգում է մասնակցության ցուցանիշներն ու հաղթահարման շեմը, փորձում են դուրս բերել այն խնդիրները, որոնք  օբյեկտիվ պատճառներ են, որոնք անդրադառնում են հաղթահարման շեմի վրա։

«Դրանցից մեկը ժամանակի անբավարարությունն է։  Դա է պատճառը, որ փոխվեց էլեկտրոնային ձևաչափով ու  նաև հաճախ ուսուցիչները բողոքում էին  ձևաթղթի մեջ անցկացնելու  գործընթացի կազմակերպումից, որն իրենց մի փոքր լարում էր, խճճում էր։

Ուսուցիչներից լսում էինք մտահոգություններ, որոնք վերաբերում էին առաջադրանքների բարդությանը։ Մեզ  համար ամենակարևոր սկզբունքներից մեկն այն է, որ  բոլոր առարկաների բոլոր առաջադրանքների  ատեստավորման գործընթացը, թեստերի բարդությունը լինի համադրելի։ Հուսով եմ՝  այս տարի կարգավորվել է, չունենք այնպիսի առարկաներ, որոնք  ավելի բարդ են անցկացվում, քան մեկ այլ առարկա»,- ասաց նա՝ հավելելով, որ ԳԹԿ-ի կողմից վերանայվել են թեստերի կառուցվածքը, որոշ  առարկաների գծով հստակ ցուցումներ էին ունեցել։

Ա.Սվաջյանն ասաց, որ  արդեն 3800-ից ավելի ուսուցիչներ ունեն, որոնք հաղթահարել են  կամավոր ատեստավորումը, մեծ մասը ստանում է  նաև հավելավճար։

«Ամեն տարի թեև 5000-6000 ուսուցիչների են մասնակցում, բայց  նրանք շատ հաճախ նույն ուսուցիչներն են, որոնք տարեցտարի փորձում են  ավելի բարձր արդյունքներ գրանցել։ Մենք չունենք գրեթե դպրոց, որտեղ գոնե մեկ ատեստավորված ուսուցիչ չլինի»,- նշեց փոխնախարարը։