Ձեր վստահելի աղբյուրը

«Այսօրվա ասուլիսում ներկայացնելու ենք բոլոր փաստերը, «բացթողումները» որոնք որոշ հանգամանքրից ելնելով չի հանրայանացվել»,- ֆեյսբուքյան ուղիղ եթերում ասաց «Գոյ» թատրոնի կառավարման խորհրդի նախագահ, ռեժիսոր Սարգիս Արզումանյանը։

Նա նշեց, որ այդ ամենն այսօր կհանրայնացվի։

«Կարծում եմ՝ ցավոտ կլինեն այն կողմերին, որոնք փորձեցին այս երկու օրը մեզ զրպարտել՝ ասելով ապատեղեկատվություն ենք տարածում կամ իրենք փորձել են մեզ փրկել, մենք չենք ցանկացել փրկվել»,- ասաց Արզումանյանը՝ նշելով, որ ասուլիսը թեժ է լինելու։

Հիշեցնենք, որ  «Գոյ» թատրոնը նոյեմբերի 8-ին ժամը 20։00-ից վերսկսել է նստացույցը 24 ժամ ռեժիմով թատրոնի մուտքի մոտ՝  ԿԳՄՍ Նախարարությունից պահանջելով միջանկյալ հրատապ լուծում՝  «Գոյ» թատրոնի աշխատանքների վերսկսումը մինչև դատարանի և իրավապահ մարմինների կողմից հարցի վերջնական լուծումը»։

Կառավարության որոշմամբ «Գոյ» թատրոնը միավորվել է Գ. Սունդուկյանի անվան ազգային ակադեմիական թատրոնին, սակայն «Գոյ» թատրոնի դերասանական ու ստեղծագործական կազմը դեմ է այդ միավորմանը, իրենք ուզում են որպես առանձին թատրոն հանդես գալ,  չեն ուզում գնալ ու աշխատել Սունդուկյանի անվան ակադեմիական թատրոնում։ Նրանք միավորման վերաբերյալ կառավարության որոշումը վիճարկում են դատարանում։
Օրեր առաջ նաև դիմել էին արդարադատության նախարարություն, որպեսզի մասնագիտական վերլուծություն տրվի Վարչական դատավարության օրենսգրքի 83-րդ հոդվածի մասով։

Դերասանների ներկայացմամբ, «արդարադատության նախարարությունը փաստեց, որ 9 ամիս  շարունակ  ապօրինաբար  դադարեցվել  է «Գոյ» Թատրոնի գործունեությունը»։ Մինչդեռ Սունդուկյանի անվան ազգային ակադեմիական թատրոնից պնդում են՝ «Գոյ» թատրոնի հայտարարությունը չունի որևէ իրավական հիմք։

«Գոյ»-ի դերասանները նոյեմբերի 4-ին գնացել էին  թատրոն՝ բանալիները վերցնելու և թատրոն մտելու համար։ Սակայն Գ. Սունդուկյանի անվան ազգային ակադեմիական թատրոն Վարդան Մկրտչյանը չտվեց մուտքի բանալին։  Դրանից հետո են «Գոյ»-ի դերասանները հաղորդում էին ներկայացրել ոստիկանություն։