Ձեր վստահելի աղբյուրը

Ավան վարչական շրջանի թիվ 57 մսուր-մանկապարտեզում, մեղմ ասած, լարված մթնոլորտ է ստեղծվել։  Panorama.am-ի խմբագրություն զանգահարած քաղաքացին պատմեց, որ տարիներ շարունակ մանկապարտեզի ղեկավար աշխատած Մարգարիտա Հովհաննիսյանի դեմ վարչական շրջանից փորձում են գործընթացներ իրականացնել։

«Ընդ որում,  շատ պրիմիտիվ գործընթացներ։ Ես մտածում էի, որ այստեղ էլ տուշոնկա շոու կլինի, բայց դեռ դրան չեն հասել։ Մանկապարտեզի երկու աշխատակից զեկուցագիր են գրում, որ իրենց նկատմամբ  ղեկավարն անհարգալից է վերաբերվում։ Հանդեսի փորձը դիտելիս ղեկավարը տեսել է, որ երեխաները լավ պատրաստված չեն։ Դաստիարակին ասել է՝ «հա-հա, հի-հի» անելու փոխարեն երեխաներով զբաղվի»,-իրավիճակն ու դրա պատճառները ներկայացրեց քաղաքացին՝ համոզմունք հայտնելով, որ վարչական շրջանում հիմա ամեն բան անում են՝ մսուր-մանկապարտեզի ղեկավարին ազատեն աշխատանքից։

Մանկապարտեզի ղեկավարի դեմ «Ավանի մսուր-մանկապարտեզներ» ՀՈԱԿ-ին ուղղված  2-3 զեկուցագիր է եղել։ Դրանցից մեկում մի դաստիարակը գրել է, որ Մ. Հովհաննիսյանը հոգեկան ծանր, ոչ հավասարակշիռ վիճակում է։ ՀՈԱԿ-ից պահանջում են պատասխանել, թե ինչու է անհարգալից։ Մյուսն էլ գրել է, որ ղեկավարը որևէ անգամ իր արածը չի գնահատել, ինչից ինքն ընկճվել է։ Ավելին, այս աշխատակիցները նշել են, որ իրենք հոգեբանական ծանր վիճակում են ու աշխատանքի գալ չեն կարողանում։

Նշենք, որ Մարգարիտա  Հովհաննիսյանը Երևանի նախկին քաղաքապետ Տարոն Մարգարյանի մորաքրոջ դուստրն է, մանկապարտեզը ղեկավարում է արդեն 13 տարի։

Մանկապարտեզի հետ կապված հարցերն իր վերահսկողության ներքո վերցրել է Ավան վարչական շրջանի ղեկավարի տեղակալ Ջուլիետա Ազարյանը։ Նա «Քաղաքացիական պայմանագիր» կուսակցության անդամ է, պարտաճանաչ կերպով մասնակցում է վարչության ու կուսակցության այլ նիստերի, ակտիվորեն լուսանկարներ է հրապարակում ֆեյսբուքյան էջում։

Panorama.am-ը կապ հաստատեց մսուր մանկապարտեզի ղեկավար Մարգարիտա Հովհաննիսյանի հետ՝ հասկանալու, ի՞նչ է կատարվում մանկապարտեզում, ինչի՞ց է սկսել այս իրավիճակը։

«Հոկտեմբերի 18-ին Ջուլիետա Ազարյանն իր մոտ ժողովի է հրավիրում թիվ 57 մանկապարտեզի կոլեկտիվին ու բանավոր հայտարարում, որ երկու աշխատակիցներ՝ Վարդուհի Հարությունյանն ու Հայկանուշ Թորոյանն այլևս չեն ենթարկվելու ղեկավարին, ուղիղ կապով զեկուցելու են իրեն, թե ինչ է կատարվում մանկապարտեզում։ Ես պահանջում եմ, որ այդ հրահանգը գրավոր ինձ ներկայացնեն, բնականաբար մինչ օրս դա չկա։ Ժողովից հետո քաոսային, լարված իրավիճակ է ստեղծվում մանկապարտեզում, օրինակ Վարդուհի Հարությունյանն առանց ինձ տեղեկացնելու չի ներկայանում աշխատանքի։ Ջ. Ազարայանը հայտարարել է, որ այդ երկու աշխատակցին մանդատ է տալիս, որ կարող են չենթարկվել ղեկավարին»,-ասաց Մ. Հովհաննիսյանը։



Հարցին, թե ինչո՞ւ են ընտրվել հենց այդ երկու դաստիարակները, Հովհաննիսյանն ասաց, նրանք զեկուցագիր են գրել իր դեմ՝  ներկայացնելով անհեթեթ մեղադրանքներ։

«Խելքին մոտ բաներ չեն, զրպարտիչ որակավորումներ են, որոնք իրականության հետ կապ չունեն, և այս ամենը գրավոր կա։ Ես չեմ ուզում մանրանալ, որևէ կոպիտ խոսք չեմ ասել որևէ մեկին։ Արհեստական լարվածություն են ստեղծում։ Ես զանգեր եմ ստանում ՀՈԱԿ-ի տնօրենի Ժ/Պ Արփինե Հակոբյանից, որ ինձ հեռացնելու են, պահանջում են, որ տաբելում բացակա դաստիարակին ներկա նշանակեմ, ինձ ասում են, դու փոքր մարդ ես, որ բան որոշես»,-նշեց նա։

Հնարավո՞ր է Տ. Մարգարյանի հետ ազգակցական կապի պատճառով է ինքը թիրախավորվումը։

«Ես նման բան պնդել չեմ կարող, բայց չեմ էլ կարող բացառել»,-պատասխանեց Հովհաննիսյանը՝ նշելով, որ օրենքի շրջանակում ինքը պայքարելու է իր իրավունքների պաշտպանության համար։

ՀՈԱԿ-ից Հովհաննիսյանից պահանջել են բացատրագիր գրել, սակայն վերջինը հրաժարվել է։

Ավան վարչական շրջանի ղեկավարի տեղակալ Ջուլիետա Ազարյանը Panorama.am-ի հետ զրույցում բացառեց Մարգարիտա Հովհաննիսյանի թիրախավորումը նախկին պաշտոնյայի հետ ազգակցական կապի պատճառով։



«Բնավ նման բան չկա։ Այս պահին այդ մանկապարտեզում ունենք պրոցես, բացատրագրեր, բողոքներ հասցեական։ Դրանք կապված են ղեկավարի վերաբերմունքի, բարոյահոգեբանական մթնոլորտի հետ։ Բողոքներ ստացել ենք ոչ միայն երկու աշխատակցից, նախավերջին դեպքում դժգոհության ներքո եղել է մոտ տասը ստորագրություն, առանձնազրույց եմ ունեցել, մտածել եմ, որ խնդիրը կլուծվի»,-ասաց Ազարյանը։

Նրա խոսքով, վարչական շրջանի որևէ այլ մանկապարտեզի հետ կապված խնդրով ինքը չի զբաղվել, «Ավանի մսուր-մանկապարտեզներ» ՀՈԱԿ-ն է զբաղվել։

«Բայց քանի որ ես շատ եմ լսել 57, 57, սա արդեն ինձ համար ազդակ էր, կանաչ լույսի նման վառվեց, որ կա խնդիր։ Ես առանձնազրույց ունեցա, լիահույս էի, որ դրական նոտայի վրա ավարտել էինք զրույցը, խնդիրը պետք է հարթվեր»,-ասաց Ազարյանը՝ նշելով, որ Հովհաննիսյանի վերաբերյալ չորս բացատրագիր եղել է մանկապարտեզի աշխատակիցների կողմից։

Վարչական շրջանի ղեկավարի տեղակալն ասաց՝ հարկ չի համարում ներկայացնել, թե կոնկրետ ինչի համար են մեղադրում աշխատակիցները ղեկավարին, բայց եղել է դեպք, «երբ թիրախավորել է այն աշխատակիցներին, որոնք ունեն որոշակի քաղաքական հայացքներ, թիրախավորել է ծնողական համայնքի, երեխաների ներկայությամբ, նրանց պիտակավորել է, անհարգալից է վերաբերվել, աշխատանքային գործունեությանը խթանելու փոխարեն նկատողություն է արել շատ կոպիտ ձևով ոչ թե առանձին այլ բոլորի ներկայությամբ, դա տեղի է ունեցել պարբերաբար, այս պահին ղեկավարի ու որոշ աշխատակիցների միջև կա հարաբերությունների խզում»։

Ջուլիետա Ազարյանն ասաց՝ հույս ունի, որ մանկապարտեզում կուլմինացիան կլինի դրական նոտայի վրա։

Թիվ 57 մսուր-մանկապարտեզի ղեկավար Մարգարիտա Հովհաննիսյանի համար իրենից դժգոհ 10 աշխատակիցների կողմից ստորագրությունները նորություն են։

«Թող ներկայացնեն։ Ըստ երևույթին, հետին թվով թղթեր են ուզում հավաքել։ Ես պահանջել եմ զեկուցագրեր, իրենք ինձ տրամադրել երկու դաստիարակի զեկուցագիր։ Թող ներկայացնեն  այդ  ստորագրությունները։  Բացի այդ, երկու աշխատակիցները նշում են, որ ես հոկտեմբերի 14-28-ն ընկած ժամանակահատվածում իրենց նկատմամբ վատ վերաբերմունք եմ ցուցաբերել։ Բայց զրպարատելուց մոռանում են, որ ես հոկտեմբերի 15-18-ը եղել եմ բյուլետենի մեջ, տանից որևէ կերպ չէի կարող իրենց նկատմամբ վատ վերաբերմունք ցուցաբերել։ Կրկնում եմ, ես պահանջել եմ զեկուցագրերը, ինձ տրամադրել են երկու դաստիարակի ներկայացրած երեք զեկուցագիր։ Ես խնդրի մասին տեղյակ եմ պահել նաև Երևանի քաղաքապետարանին։ Օրենքի շրջանակում գնալու եմ մինչև վերջ»,-ասաց Մ. Հովհաննիսյանը։