Աղազարյան. Երբ երիտասարդ էի ու լսում էի «Կիլիկիա» երգը, լացում էի, երբ մեծացա, հասկացա՝ Կիլիկան՝ ուր, ես՝ ուր, ինչու պետք է լացեմ
«Ես մի թեթև անդրադառնամ պարոն Ռուստամյանի ելույթին։ Պարոն Ռուստամյան, ձեր ելույթը շատ, շատ էմոցիոնալ էր, իհարկե, բայց որոշ դրվագների հետ ես պետք է չհամաձայնեմ»,- ԱԺ-ում ունեցած ելույթում ասաց ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը։
Նա նշեց, որ հայ ժողովուրդն այն փոքրաթիվ ազգերից է մարդկության պատմության մեջ, որ հազարամյակների բոհով անցնելով՝ այսօր ունի պետականություն։
Դիմելով «Հայաստան» խմբակցության պատգամավոր Արմեն Ռուստամյանին՝ Աղազարյանն ասաց. «Դուք մեջբերեցիք նաև Եղիշե Չարենցի հայտնի բանաստեղծությունը, ես խորհուրդ կտամ, որ մյուս անգամ, երբ ընթերցեք այդ բանաստեղծությունը, ուշադրություն դարձրեք այն տողի վրա, որտեղ Մասիս սարի մասին է ասվում։
Մեկ այլ բան էլ. պարոն Ռուստամյան, երբ որ դուք երիտասարդ էիք կամ հիամ, մի լավ, զգացմունքային երգ կա՝ «Երթամ, հասնեմ զիմ Կիլիկիա»: Այդ երգը որ լսում եք, ի՞նչ ասոցիացիաներ ունեք։
Օրինակ, երբ ես լսում էի այդ երգը պատանեկան, երիտասարդ տարիքում, լացում էի, բայց երբ մի քիչ մեծացա, ավելի ուսումնասիրեցի այդ դրվագները, հասկացա, բայց ես ինչի՞ համար եմ Կիլիկիայի համար լացում, ինչի՞ համար եմ անտեղի էներգիա ծախսեմ դրա վրա: Կիլիկան՝ ուր, ես՝ ուր։ Կիլիկիան իմ պատմական հայրենիքը չէ։
Վանն իմ պատմական հայրենիքն է, Կարսն իմ պատմական հայրենիքն է, բայց Կիլիկիան իմ պատմական հայրենիքը չէ։
Այն ժամանակ ձեր նման կրթված, զարգացած, ուժեղ տղերքը թողեցին մեր հայրենիքը, գնացին ուրիշ տեղ, պետություն ստեղծեցին, բայց փառք Աստծո, որ դուք չեք թողնում հայրենիքը և պայքարում եք իշխանության գալու համար։
Դա շատ լավ է, որպեսզի մեզ հեռացնեք իշխանությունից, եթե մենք ինչ-որ բաներ այն չենք անում, լավ չենք անում։ Դե մենք էլ, այդ ամեն ինչը հաշվի առնելով, փորձում ենք այնպես անել, որ սխալներին թույլ չտանք»,- ասաց նա:
Հիշեցնենք, որ այսօր Արմեն Ռուստամյանն իր ելույթում անդրադառնալով «իրական Հայաստան» և «պատմական Հայաստան» ձևակերպումներին, նշելով, որ ինչ-որ նոր կատեգորիա կարող է առաջանալ՝ «իրական Հայաստանի քաղաքացի» և ովքեր են լինելու նրանք՝ ասել էր. «Մոտավորապես հասկանում է. «Ձեր հայտարարություններից բխում է, որ, օրինակ, Հայաստանի այն քաղաքացիները, որոնք իրենց տանը կունենան Արարատ լեռան նկարը, պրոբլեմ են ունենալու, որովհետև Արարատը պետք է արագ փոխարինվի Արագածով:
Եթե, օրինակ, արտասանեն «Ես իմ անուշ Հայաստանի» բանաստեղծությունը ու հասնեն այն տողին, որ «աշխարհ անցիր, Արարատի նման ճերմակ գագաթ չկա, որպես անհաս փառքի ճամփա` ես իմ Մասիս սարն եմ սիրում», կասեն` ո՞նց թե քո Մասիս սարը, ո՞վ ասաց, որ Մասիս սարը քոնն է, իսկ եթե ուզում ես շատ արտահայտել քո սերը Մասիսի նկատմամբ, ասա, որ «ես թուրքերի Մասիս սարն եմ սիրում», կլինի շատ ճիշտ, խնդիր չի առաջացնի հարևանների հետ»։
Լրահոս
Տեսանյութեր
Ժողովուրդը լրիվ անտեսված է, ամեն ինչ ի շահ իշխանության է արվում. Երևանցիները՝ տրանսպորտի մասին
