Ձեր վստահելի աղբյուրը

«Պատմամշակութային ժառանգության ոչնչացումով աղճատվում է  բնապատմական լանդշաֆտը»,-Երևանում կայացած «Ադրբեջանի ագրեսիայի ազդեցությունը մարդու իրավունքների և շրջակա միջավայրի պաշտպանության վրա» խորագրով համաժողովին ասաց Արցախի պատմական միջավայրի պահպանության պետական ծառայության տնօրեն Արմինե Հայրապետյանը։

Նա նշեց, որ միայն հուշարձանները չեն ոչնչացվում ադրբեջանցիների կողմից, նաև բնական լանդշաֆտն է ոչնչացվում։

«Ադրբեջանն Արցախում էթնիկ զտում իրականացնելուց հետո սկսեց կիրառել 1920 -ականներից որդեգրած իր քաղաքականությունը՝ տարածքի ազատումը հայկական հետքից։ Այս պահին փորձում է  ջնջել Արցախի հայկականությունը՝ միգուցե դրանով նաև փակելու հայրենիք գաղափարի խնդիրը»,- ասաց Ա.Հայրապետյանը։

Նա նշեց, որ Ադրբեջանն հիմնահատակ ավերել է Շուշիի 19-րդ դարի Հովհաննես Մկրտիչ եկեղեցին՝ Կանաչ ժամ, Բերձորի Սուրբ Համբարձման եկեղեցին, Մեխակավանի Զորավոր Աստվածածնի եկեղեցին։ Դրան զուգընթաց ոչնչացվում են  խաչքարեր, հուշահամալիրներ՝ նվիրված Արցախյան ազատամարտին, Հայրենական պատերազմին։ Հիմնահատակ ավերվում են բնակավայրեր, գերեզմանոցներ։

«Այսինքն, Ադրբեջանը գետնի վրա վերացնում է այդ տարածքի հայկականության մասին վկայող  պատմական փաստեր։

Պատմամշակութային ժառագությունը ժողովրդի հիշողության կրիչն է։ Այսօր Ադրբեջանը պատերազմում է  մեր ժողովրդի հիշողության դեմ, որպեսզի ամեն ինչ վերացնի, արցախահայությունը Արցախ վերադառնալու հույսեր չունենա»,- ասաց Ա. Հայրապետյանը։

Մանրամասն՝ տեսանյութում։