Ձեր վստահելի աղբյուրը

«Ինչու է Ադրբեջանն այդքան շատ վախենում դատական գործընթացներից։ Որովհետև դատական գործընթացում ճշմարտությունը բացահայտվում է հեշտությամբ»,- Երևանում ընթացող «Ադրբեջանի ագրեսիայի ազդեցությունը մարդու իրավունքների և շրջակա միջավայրի պաշտպանության վրա» խորագրով համաժողովին ասաց միջազգային իրավունքի մասնագետ Արա Ղազարյանը։

Նա նշեց, որ եթե Հայաստանը  առաջ է բերում վերադարձի իրավունքի մասին հարց, Ադրբեջանը փորձում է հակակաշռել 1992-94 թթ. պատերազմի արդյունքներով։

«Վերադարձի իրավունքը կապվում է հայրենիք գաղափարի հետ, քո սեփական երկիր վերադարձը։ Դրա համար Ալիևը հանկարծ հիշեց «Արևմտյան Ադրբեջանի» մասին։ Այսինքն, նրան հուշեցին, որ եթե միայն գույքի վրա շեշտը դնես, որ գույք եք թողել Հայաստանում, հաջողության չեք հասնի, տեսական հիմքը թույլ է, իսկ եթե հայրենիք գաղափարը շահարկվի, որ «Արևմտյան Ադրբեջան» է  եղել Հայաստանի տարածքում, ավելի լայն կարող եք ներկայացնել տեսական հիմքերը։

Իրականում չկա, կա միայն անշարժ գույք, որը  թողել են ադրբեջանցիները Հայաստանի որոշ տարածքներում։ Ադրբեջանի քաղաքականությունն է»,- ասաց Ա. Ղազարյանը։ 

Նա ընդգծեց, որ Ադրբեջանը վախենում է  դատական գործընթացներից, քանի որ վերադարձի իրավունքի հետ միասին պարզվելու է, որ Ադրբեջանը միջազգային հանցագործ պետություն է, բազում հանցագործություններ է կատարել, ընդհուպ մարդկության դեմ հանցագործություններ, դրա համար պահանջում է  Հայաստանին հետ վերցնել իրավական գործընթացները։ 

Արա Ղազարյանն ընդգծեց. «Վերադարձի իրավունքն ընդամնենը տուն վերադարձ չէ, վերադարձ է հայրենիք։ Հայրենիքը կապ չունի քաղաքացիության հետ, դա Մարդու  իրավունքների եվրոպական կոնվենցիայի 8-րդ հոդվածի տասնյակ բաղադրիչներն են։ Մնում է այդ ամենը կիրառենք մեր աշխատանքով»։

Մանրամասն՝ տեսանյութում։