Ձեր վստահելի աղբյուրը

«Քննչական կոմիտեն հաղորդում է  ստացել մի անձի կողմից իրեն հարված հասցնելու վերաբերյալ։ Հաղորդման առթիվ քրեական վարույթ է նախաձեռնվել Քրեական օրենսգրքի 195 հոդվածի 1-ին մասի հատկանիշներով»,-Panorama.am-ի հետ զրույցում հայտնեց ՔԿ մամուլի խոսնակ Գոռ Աբրահամյանը։

Նրա խոսքով, այս պահին իրականացվում է քննություն, պարզվում են հանգամանքները։

«Այլ տվյալ հաղորդել չեմ կարող»,-ասաց նա։

Նշենք, որ Քրեական օրենսգրքի 195 հոդվածը վերաբերում է ֆիզիկական ներգործությանը։ Հոդվածի առաջին մասը սահմանում է.

«Հարվածներ հասցնելը կամ բռնի այլ գործողություններ կատարելը, եթե չեն առաջացել սույն օրենսգրքի 171-րդ հոդվածով նախատեսված հետևանքները պատժվում է տուգանքով` առավելագույնը քսանապատիկի չափով, կամ հանրային աշխատանքներով` ութսունից հարյուր հիսուն ժամ տևողությամբ, կամ ազատության սահմանափակմամբ` առավելագույնը մեկ տարի ժամկետով, կամ կարճաժամկետ ազատազրկմամբ՝ առավելագույնը մեկ ամիս ժամկետով»։

 «Մեդիահաբ»-ն ավելի վաղ գրել էր,  որ այսօր առավոտյան վիճաբանություն է ծագել Երևանի ՋԷԿ-ի նորանշանակ փոխտնօրեն Սարգիս Հովհաննիսյանի և ՋԷԿ-ի անվտանգության պետ Արթուր Պահլավունու միջև, որը հետո վերածվել է ծեծկռտուքի։

Panorama.am-ի տեղեկություններով, իրականում ոչ թե ծեծկռտուք է տեղի ունեցել, այլ ՊՊԾ նախկին պետ Սաքոն է հարվածել Արթուր Պահլավունուն, որը Երևանի քաղաքապետի պաշտոնը զբաղեցնող Տիգրան Ավինյանի կնոջ՝ Մարիամի հայրն է։  Պահլավունին ուղարկվել է բուժհաստատություն՝ փորձաքննություն անցնելու համար։

Panorama.am-ը փորձեց Ավինյանի մամուլի խոսնակ Հայկ Կոստանյանից ճշտել, արդյոք տուժողն Ավինյանի անե՞րն է, եթե այո, ինչպե՞ս է նրա առողջակա վիճակը։ Սակայն  խոսնակը տևական ժամանակ զանգերին չի պատասխանում։