Ձեր վստահելի աղբյուրը

Աշխարհի բրոնզե մեդալակիր, Եվրոպայի չեմպիոն Վազգեն Թևանյանը, Եվրոպայի չեմպիոն, աշխարհի բրոնզե մեդալակիր Արման Անդրեասյանը, Եվրոպայի բրոնզե մեդալակիր, Մ23 աշխարհի փոխչեմպիոն Մանվել Խնձրցյանը, Մ23 աշխարհի փոխչեմպիոն Գևորգ Թադևոսյանը և երիտասարդների Եվրոպայի չեմպիոն Կնյազ Իբոյանը ֆեյսբուքում անդրադարձել են Երևանի Կարեն Դեմիրճյանի անվան մարզահամերգային համալիրում նոյեմբերի 20-22-ը անցկացվելիք ըմբշամարտի զինվորականների աշխարհի 37-րդ առաջնությանը իրենց չմասնակցելու փաստին։

«Ցանկացած իրավիճակում երկրի շահերը գերադասելի են՝ սա թիմի անունից ասում եմ որպես հայ զինվոր և մարզիկ: Նոյեմբերի 20-24-ը Երևանում անցկացվելու է բանակայինների աշխարհի առաջնությունը, որին չեն մասնակցելու թիմի լավագույն արդյունքները գրանցած և իրենց քաշային կարգերում առաջատար մարզիկները: Խնդրի որոշման պատճառները անհայտ են, չի տրվել որևէ հստակ բացատրություն: Նման վերաբերմունքը բացասաբար ազդեցություն ունի ոչ միայն թիմի, այլև բանակի, սպորտի և ամբողջ երկրի վարկանիշի վրա:

Հարգելի լրագրողներ, ցավոք այս պահին չենք կարող պատասխանել ձեր հարցերին, քանի որ մեզ ևս չեն տրամադրել որևէ հստակ բացատրություն կամ տեղեկություններ այս իրավիճակի վերաբերյալ»,- գրել է Արման Անդրեասյանը:

«Հարգելի հայրենակիցներ և լրատվամիջոցների ներկայացուցիչներ. խոսում ենք ոչ միայն որպես հայ, այլ նաև զինվորներ և մարզիկներ, որոնց համար սպորտը ոչ միայն մրցակցություն է, այլև մեր երկրի վարկանիշը միջազգային ասպարեզում ներկայացնելու միջոց:

Նոյեմբերի 20-24-ը Երևանում անցկացվելու է բանակայինների աշխարհի առաջնությունը: Ցավոք, մեր թիմը չի մասնակցի ուժեղագույն կազմով: Այս որոշման պատճառները մեզ համար նույնպես անորոշ են, քանի որ որևէ հստակ մեկնաբանություն և բացատրություն չի տրվել: Նման իրավիճակները բացասաբար են ազդում ոչ միայն մեր թիմի վրա, այլև բանակի, սպորտի և մեր երկրի ընդհանուր հեղինակությանը: Ավելին՝ դրանք կասկածի տակ են դնում մեր պատրաստակամությունը՝ աջակցելու և բարձրացնելու հայրենիքի հանդեպ հավատը բոլոր հարթություններում:
Այս պահին չենք կարող պատասխանել լրացուցիչ հարցերին, քանի որ չունենք լրացուցիչ տեղեկություններ»,- գրել է Վազգեն Թևանյանը:

«Մենք նախ և առաջ Հայաստանի Հանրապետության քաղաքացի ենք, հետո Հայաստանի ըմբշամարտի թիմի անդամ և այս տարվա օգոստոսի 19-ից նաև ԶՈՒ-ի անդամ: Մեր ամբողջական թիմը համալրված պատրաստ է եղել երկրի պատիվը բարձր պահել: Ցավոք, դեռևս անհայտ պատճառներով ԲԿՄԱ-ի մեր թիմը չի մասնակցելու մոտ օրերս Երևանում կայանալիք բանակայինների աշխարհի առաջնությանը: Նման անհարգալից մոտեցումը ազդում է և բանակի, և սպորտի, և առհասարակ հայի հեղինակության վրա»,- գրել է Մանվել Խնձրցյանը:

«Հարգելի հայրենակիցներ, Հայաստանի Հանրապետությունում կայանալիք աշխարհի առաջնությանը մեր թիմը պատրաստվում է ներկայանալ ոչ լիարժեք կազմով, որի պատճառը չգիտենք ոչ մեկս: Մեր թիմը պատրաստ է եղել երկրի պատիվը բարձր պահել ու պատրաստ է, բայց այդ հարցում մեզ աջակցության փոխարեն անորոշություն են մատուցում»,- գրել է Կնյազ Իբոյանը:

«Սիրելի հայ ազգ, մենք որպես ՀՀ քաղաքացի և որպես մարզիկ Հայաստանում կայանալիք բանակայինների աշխարհի առաջնությանը ինչ-ինչ պատճառներով չենք մասնակցելու: Մեր թիմը պատրաստվում է ներկայանալ ոչ ամբողջական և հիմնական կազմով, ինչի պատճառները մեզ անհայտ են մնում և առանց բացատրությունների: Օգոստոսի 19-ից Զինված Ուժերի ԲԿՄԱ-ի մաս կազմող մարզիկներս պատրաստ ենք եղել հայերնիքի պատիվը միշտ բարձր պահել միջազգային ասպարեզոմ և օրեր անց մեր իսկ հայրենիքում»,- գրել է Գևորգ Թադևոսյանը: