Ձեր վստահելի աղբյուրը

«Երեկ մասնակցել եմ «Քաղաքացիական պայմանագիր» կուսակցության նիստին, վարչությունն ինձ հրավիրել էր պարզաբանումներ տալու լսումների հետ կապված բոլորին հայտնի միջադեպի կապակցությամբ»,- ԱԺ-ում լրագրողների հետ զրույցում ասաց ՔՊ-ական պատգամավոր Հովիկ Աղազարյանը:

Նա նշեց, որ մասնակցել է նիստի այդ հատվածին, գործընկերները տվել են բազմաթիվ հարցեր, պարզաբանելու այս կամ այն դրվագը, որից հետո  դուրս է եկել նիստից, որովհետև վարչության անդամ չէ։

«Ոչ թե չգիտեմ՝ ինչ որոշում են կայացրել, այլ չգիտեմ՝ որոշում կայացրել են, թե ոչ: Ոչ մի դժգոհություններ չունեին ինձանից, բոլորն էլ շատ սիրալիր ձևով իմ հետ ճշտում էին, թե օրինակի համար ինչպես եղավ, որ ես պարոն Քյարամյանին դիմեցի «արա» բառով, ինչո՞վ է պայմանավորված այն հանգամանքը, որ պարոն Քյարամյանը հայտարարեց, որ ես այդ կեցվածքը ունեմ, որովհետև իմ որդու շահերն եմ պաշտպանում։ Նմանատիպ հարցեր էլի»,- ասաց Աղազարյանը։

Հարցին՝ հնարավո՞ր է մանդատը վայր դնի, ինչպես ՔՊ-ական Նարեկ Զեյնալյանը, իր օրակարգում մանդատ վայր դնելու հարց կա՞, նա պատասխանեց. «Ես այդ հարցը չեմ քննարկում: Իմ օրակարգում չկա նման հարց։ Ինձ չեն հորդորել մանդատ դնել»։

Նա նշեց, որ գործընթացը գնում է, կարգապահական վարույթ է, այդքան հեշտ չի մի անգամ մեկին լսելով՝ որոշում կայացնել։

«Երբ որ ներկայացվի մանդատ դնելու պահանջ, այդ ժամանակ կմտածենք։ Հնարավոր է, որ դնեմ։ Եթե, օրինակ, պարոն Քյարամյանը, ինչպես ես հայտարարել եմ հրապարակավ անուններ տա և հիմնավորի, որ այդ մարդիկ իմ անունից դիմել են իրեն խնդրանքով, իմ որդու մասնակցությամբ ընկերության հետ կապված քրեական վարույթի շրջանակներում, ապա ես կդնեմ իմ մանդատը, ես դա հայտարարել եմ։ Իսկ եթե չհրապարակի, ուրեմն առիթ չկա»,- ասաց Հովիկ Աղազարյանը:

Նա նշեց, որ իր համար անակնկալ է եղել Նարեկ Զեյնալյանի՝ մանդատը վայր դնելու որոշումը. «Պատճառների մասին չգիտեմ, բայց, բնականաբար, անակնկալ է, որ Ազգային ժողովի հանձնաժողովի նախագահը մանդատը վայր է դնում։ Չնայած ինքը բերել էր ինչ-որ պարզաբանումներ, հիմնավորումներ, բայց, այդուհանդերձ, անակնկալ էր, ինչպես ցանկացածի համար»։