Ձեր վստահելի աղբյուրը

«Լոկոմոտիվի» և Հայաստանի հավաքականի ֆուտբոլիստ Նաիր Տիկնիզյանը Metaratings.ru-ին տված հարցազրույցում խոսել է ուկրաինացի Ալեքսանդր Պետրակովին ազգային հավաքականի գլխավոր մարզչի պաշտոնից հեռացնելու մասին։

«Ես միայն երախտագիտության խոսքեր ունեմ Ալեքսանդր Պետրակովին, նրա հետ միասին սկսեցինք մեր ճանապարհն ազգային հավաքականում։ Ինչպե՞ս արձագանքեց հավաքականը: Ֆուտբոլից բացի այլ բանի մասին անհանգստանալու կամ մտածելու ժամանակ չունեինք։ Մենք շնորհակալություն հայտնեցինք Վասիլևիչին և շարունակեցինք մեր աշխատանքը։ Ավելին, վերջին երկու ամիսները շատ կարևոր էին, որպեսզի կարողանայինք երկրորդ տեղը գրավել և խաղալ փլեյ-օֆֆում»,- ասել է Նաիր Տիկնիզյանը։

Նրա խոսքով,  երբ անհաջողությունների շարան է լինում և արդյունքներ չկան, ապա մարզչի հրաժարականը բնական է. «Ավելի հեշտ է հեռացնել մեկ մարդու, քան փոխել թիմի կեսը։ Դա սպասելի էր, և ամեն ինչ դեպի դա էր գնում»։

Հարցին՝ Պետրակովի հետ խնդիրներ եղե՞լ են՝ հաշվի առնելով, որ նա ուկրաինացի մարզիչ է, իսկ դուք ՌՊԼ-ի խաղացող, Տիկնիզյանը պատասխանել է. «Ընդհանրապես ոչինչ չկար։ Սպորտը քաղաքականությունից դուրս է»։

Պետրակովը Հայաստանի հավաքականը գլխավորել է 2023 թվականի հունվարից։  Ուկրաինացի մարզիչը Հայաստանի ազգային հավաքականում անցկացրել է 18 հանդիպում, որոնցում թիմը տարել է 4 հաղթանակ, 4 խաղ ավարտվել է ոչ-ոքի և 10-ում  պարտություն կրել։  Հոկտեմբերին՝ Հյուսիսային Մակեդոնիայից սեփական դաշտում կրած 0:2 հաշվով պարտությունից հետո, մարզիչը հեռացել էր հավաքականից։