Ձեր վստահելի աղբյուրը

2025 թվականի բյուջեով կառավարությունը կրկին հարկային մեծ մուտքեր է նախանշել, բայց այն արդեն ապահովելու է ՀՀ սովորական քաղաքացու գրպանի հաշվին՝ նրա համար թանկացնելով ծառայությունները և սահմանելով լրացուցիչ հարկային բեռ։ Վերոնշյալ հարցերի շուրջ «Panorama-հարցազրույց»-ի տաղավարում իր տեսակետը հայտնեց «Հայաստանը ես եմ» նախաձեռնության ղեկավար, Աուդիտորների պալատի նախագահ Նաիրի Սարգսյանը։

Հարցազրույցում հնչեցված հիմնական թեզերի երկրորդ մասը՝  ստորև։

▪2025 թվականին մենք ականատես ենք լինելու հանրային ծառայությունների՝ էլեկտրաէներգիայի, գազի, ջրի թանկացումների։ Կտեսնենք, որ նախաձեռնություններով հանդես են գալու։

▪Բյուջեն շարունակում է լինել վտանգավոր։ Բյուջեն խոստանում է աղքատացում, գնաճ և 2025 թվականին եկամուտների թերհավաքագրում։ Բյուջեն Հայաստանի Հանրապետությանը խոստանում է պարտքի աճ, այսինքը՝ յուրաքանչյուր բնակչի պարտավորությունների աճ և հետագայում զարգացման ներուժի էական խեղաթյուրում, նրա համար խոչընդոտների ստեղծում։

▪Խաղողագործության ոլորտում տարիներ շարունակ պետությունը պետական միջոցները է ծախսում, որը մենք վատնում և հանցագործություն ենք համարում, երբ սուբսիդավորվում է մթերող ընկերությունների վարկային տոկոսները։ Միևնույն ժամանակ մենք իրավիճակ ենք տեսնում, երբ Հայաստանից ՌԴ արտահանվող կոնյակի վրա արգելք է սահմանվում, քանի որ արտահանված կոնյակի 85%-ը եղել է ոչ խաղողի հումքով, այսինքը ոչ խաղողի սպիրտից է եղել։

▪Այսինքը՝ կառավարությունը տարիներ շարունակ սուբսիդավորում է մի բանկային տոկոսադրույք, որն ընդհանրապես ուղղված չէ գյուղատնտեսությանը։ Այնինչ տարիներ առաջ մենք ասում էինք, որ սուբսիդավորումը պետք է ուղղել գյուղացիներին, անձամբ խաղողագործներին։ Նրանց վարկային տոկոսները պետք է սուբսիդավորել, ոչ թե մթերող կազմակերպությունների։

▪Հարկային օրենսգրքի նման փոփոխությունը և եկամուտների համատարած հայտարարագրումը, ուղղված են հասարակ քաղաքացիների միջոցով հարկային բեռի բաշխմանը։ Ըստ տրամաբանության, բաշխումն ինչքան լայն լինի, այնքան մեկ անձի հարկային բեռը փոքր կլինի, բայց հարց է՝ այդ հարկային բեռը տանելի կլինի՞, թե՞ չի լինի։ Որովհետև բանկային գաղտնիքի հասանելիություն ստանալով, յուրաքանչյուր քաղաքացի հարկային լրացուցիչ բեռի տակ է մտնելու, այն դեպքում, երբ նա հարկվող սուբյեկտ չի հանդիսանալու։

▪Իրենց հաջորդ նպատակը լինելու է վախի մթնոլորտի տարածումը։ Այսինքը՝ ընդդիմադիր կարծիքներ հանկարծ չարտահայտեք, երբևէ կառավարությա ծրագրին կամ խոսույթին չհակադրվեք, հակառակ պարագայում հարկային մարմինները կայցելեն ձեր բնակարանները ստուգման նպատակով։ Այս իրավունքն օրենքով ամրագրել են, կառավարությունը դրան հավանություն է տվել և այն շուտով կգնա ԱԺ։

▪Այս ամեն ինչն ուղղված է ՀՀ յուրաքանչյուր քաղաքացու աղքատացմանը, որովհետև այդ փոփոխությունների վերջնական հասցեատերը ՀՀ քաղաքացին է՝ իր սպառումով։ Քաղաքացին չգիտի, որ խանութից ձեռք բերված բրնձի 20%-ը վճարում է, ոչ թե խանութի տիրոջն, այլ ՀՀ-ին՝ որպես ավելացված արժեքի հար։ Խանութը միջնորդ է հանդիսանում՝ 20%-ը վերցնելով և հանձնելով պետությանը։

Հարցազրույցն ամբողջությամբ՝ կցված տեսանյութում։