Ձեր վստահելի աղբյուրը

«Հրապարակ» թերթը գրում է.

«ՔՊ-ական Նարեկ Զեյնալյանը, որ Փաշինյանի «խնդրանքով» մանդատից հրաժարվելու դիմում է ներկայացրել, վերջին փորձերն է անում Փաշինյանի բարեհաճությանն արժանանալու համար․ երեկ նա կռիվ տվեց ընդդիմադիր պատգամավոր Արմենուհի Կյուրեղյանի դեմ։ Քանի որ օրենքով պահանջվող ժամկետը չի լրացել, եւ Զեյնալյանի՝ մանդատից հրաժարվելու դիմումը դեռ չի հաստատվել, նա դեռ պատգամավոր է և ԱԺ առողջապահության հանձնաժողովի նախագահ:

Երեկ Զեյնալյանն իր վերջին նիստը վարում էր` բաց չթողնելով Փաշինյանին քծնելու և ընդդիմադիր կանանց նեղելու առիթը։ Համառորեն հրաժարվում էր ձայնի իրավունք տալ Կյուրեղյանին, որը հարց ուներ նախագիծը զեկուցող առողջապահության պաշտոնյային: Չնայած վերջինս դեմ չէր պատասխանել, սակայն Զեյնալյանն աննկարագրելի վճռականությամբ պնդեց, որ տիկին պատգամավորը չունի հարցի իրավունք, քանի որ կանոնակարգը թույլ չի տալիս։ Ուր էր, թե իշխանական պատգամավորը նույն վճռականությամբ օրենքին հավատարիմ մնար եւ իր իրավունքները պաշտպաներ, երբ մի մեղմ ելույթի համար, անօրինական կարգով, իրեն ԱԺ դուռը ցույց տվեցին»։

Մանրամասները թերթի այսօրվա համարում։

Զեյնալյանի թեման շարունակելով՝ «Ժողովուրդ»-ը գրում է. Նարեկ Զեյնալյանն Արարատ Միրզոյանի ընկերն է։

«ՀՀ արտգործնախարար Արարատ Միրզոյանը նեղսրտել է իր թիմակիցներից. պատճառն իր մտերիմ ընկերոջ՝ Նարեկ Զեյնալյանի պատգամավորական մանդատը վայր դնելու պահանջն է Փաշինյանի կողմից:

Հիշեցնենք, որ իր ելույթի ժամանակ Զեյնալյանը կոպիտ ձեւով կշտամբեց ՔԿ արդեն նախկին նախագահ Արգիշտի Քյարամյանին՝ ասելով նրան. «Դուք խոսում եք Ազգային ժողովի պատգամավորների հետ, Ձեր կաբինետում չեք և Ձեր ենթակաների հետ չեք խոսում։ Ես չեմ կարողանում ընկալել՝ որն է ավելի վատ՝ հասկանալով որտեղ եք գտնվում և նման ոճո՞վ եք խոսում պատգամավորների հետ, թե՞ հակառակը»:

«Ժողովուրդ» օրաթերթի տեղեկություններով՝ Արարատ Միրզոյանը թիմակիցների հետ զրույցում ասել է, որ անարդար են վարվել Նարեկ Զեյնալյանի հետ, Միրզոյանի պնդմամբ՝ վերջինս զուսպ անձնավորություն է, և պետք չէր նրան զրկել մանդատից, քանի որ կան այլ պատգամավորներ ովքեր խայտառակ միջադեպերի կենտրոնում են հայտնվել, բայց Փաշինյանը նրանց հանդեպ բարեհաճ է գտնվում ու չի պատժում: Բանն այն է, որ Նարեկ Զեյնալյանն Արարատ Միրզոյանի ընկերն է, ու հիմա Փաշինյանի՝ Զեյնալյանին մանդատից զրկելու հարցը խիստ վրդովվեցրել է նրան, ինչի մասին արտահայտվել է նաև վարչության անդամների մոտ:

«Ժողովուրդ» օրաթերթը գրավոր հարցմամբ դիմել էր ԱԳՆ՝ պարզելու, թե ինչպես է Արարատ Միրզոյանը վերաբերում Նարեկ Զեյնալյանի պաշտոնանկությանը: ԱԳՆ-ից, սակայն, հրաժարվեցին հարցին պատասխանելուց՝ պատճառաբանելով, թե այն տեղեկություն պարզելու նպատակով չէ, այլ գնահատականի, որը չեն կարող տալ»:

Մանրամասները թերթի այսօրվա համարում։